خیبرپختونخوا کے اگلے وزیراعلیٰ وفاقی حکومت کے حمایت یافتہ ہوں گے: کامران مرتضیٰ

اسلام آباد: جمعیت علمائے اسلام (ف) کے رہنما سینیٹر کامران مرتضیٰ نے کہا ہے کہ خیبرپختونخوا کے اگلے وزیراعلیٰ وفاقی حکومت کے حمایت یافتہ ہوں گے۔

نجی ٹی وی سے گفتگو کرتے ہوئے انہوں نے دعویٰ کیا کہ پی ٹی آئی سے ایک فرد کو توڑ کر آئندہ وزیراعلیٰ کے لیے تیار کر لیا گیا ہے۔

انہوں نے کہا کہ محمود خان اچکزئی اپوزیشن لیڈر ہیں اور ہم ان کا احترام کرتے ہیں، جبکہ مولانا فضل الرحمن قومی اسمبلی میں اپوزیشن لیڈر نہیں بنیں گے۔

ان کے مطابق حکومتی رضامندی اور مدد سے خیبرپختونخوا اسمبلی میں پی ٹی آئی کے اندر فارورڈ بلاک بنے گا اور اسی بلاک کے ذریعے معاملات آگے بڑھیں گے۔

کامران مرتضیٰ نے کہا کہ مسئلے کا حل جمہوری انداز میں آگے بڑھنے میں ہے، پی ٹی آئی رہے گی اور کسی کو پی ٹی آئی سے مسئلہ نہیں۔

انہوں نے کہا کہ جے یو آئی (ف) خیبرپختونخوا کے حوالے سے اپنے پروگرام پر جدوجہد کر رہی ہے، کسی دوسری جماعت کے پروگرام پر نہیں۔

دہشت گردی کے خاتمے پر کسی کو اعتراض نہیں۔ ان کے مطابق یہ ختم ہونی چاہیے، لوگوں کی جان، مال اور عزت محفوظ ہونی چاہیے، اور دہشت گردی کا خاتمہ صرف اعلانات تک محدود نہیں رہنا چاہیے۔