چیئرمین نیب نذیر احمد: موجودہ حکومت کے کیسز بھی کھلے ہیں، صرف تشہیر نہیں ہو رہی

اسلام آباد: چیئرمین نیب لیفٹیننٹ جنرل (ر) نذیر احمد نے کہا ہے کہ موجودہ حکومت کے کیسز بھی کھلے ہوئے ہیں۔ ان کے مطابق متعلقہ ایم این ایز اور ایم پی ایز کو پتہ ہے کس کس کا کیس کھلا ہے، صرف میڈیا پر ابھی تشہیر نہیں ہو رہی۔

میڈیا سے گفتگو میں انہوں نے کہا کہ پوچھا جاتا ہے موجودہ حکومت کے کیس کب کھولیں گے، کس نے کہا کیس نہیں کھلے۔ ان کا کہنا تھا کہ ان کا یہ نظریہ نہیں کہ سسٹم بیٹھ چکا ہے، صرف چیلنجز ہیں۔

بیرونِ ملک سے تعاون پر شکوہ

چیئرمین نیب نے کہا کہ جمہوریت پسند ممالک جو ہمیں لیکچر دیتے ہیں ان کا اپنا کردار مشکوک ہے۔ منی لانڈرنگ مقدمات پر وہ ممالک جواب ہی نہیں دیتے اور ان کے قول و فعل میں زمین آسمان کا تضاد ہے۔ ان کے بقول خود ان ممالک نے لوگوں کو مزید منی لانڈرنگ کی گنجائش دے رکھی ہے۔

انہوں نے کہا کہ گلف وار کی وجہ سے پیسہ باہر جانا رک گیا ہے، اب واپس آئے گا۔ لوگ باہر بچے پڑھا رہے ہیں اور یہاں ٹیکس نہیں دے رہے۔ باہر کے ممالک سے جواب تک نہیں ملتا، اور وہ یہاں بے بسی کا اظہار کر رہے ہیں۔

ریکوری اور ناموں کا معاملہ

نذیر احمد نے کہا کہ پگڑی اچھالے بغیر کسی سے پوچھیں تو فوری لوٹی رقم واپس کر دیتا ہے۔ ان کے مطابق اتنا پاکستان کا بجٹ نہیں جتنی ریکوری کر کے دی جا رہی ہے، اور ان کی ریکوریوں میں مصالحہ شامل نہیں ہے۔

انہوں نے کہا کہ آپ کو کیا کسی کا کٹا سر چاہیے یا پگڑیاں چاہئیں، وہ کسی کا نام اس لیے نہیں دیتے کہ ممکن ہے وہ کل بری ہو جائے۔