دکی: اسسٹنٹ کمشنر لونی کا ڈی ایچ کیو ہسپتال اور بی ایچ یوز کا دورہ، عملے کی حاضری اور ادویات کا جائزہ

دکی: ڈپٹی کمشنر دکی فضل الرحمن کبدانی کی ہدایت پر اسسٹنٹ کمشنر لونی فتح خان بنگلزئی نے ضلع کے مختلف مراکزِ صحت کا تفصیلی دورہ کیا اور طبی سہولیات، عملے کی حاضری اور ادویات کی دستیابی کا جائزہ لیا۔

اسسٹنٹ کمشنر نے ڈسٹرکٹ ہیڈکوارٹر ہسپتال دکی، بی ایچ یو کلی علی محمد اور بی ایچ یو کلی محمد خان کا دورہ کیا۔ ڈسٹرکٹ ہیڈکوارٹر ہسپتال کے معائنے کے دوران انہوں نے ڈاکٹرز، پیرامیڈیکل اسٹاف اور دیگر عملے کی حاضری چیک کی اور ہسپتال میں فراہم کی جانے والی طبی سہولیات اور انتظامی امور کا جائزہ لیا۔

اسسٹنٹ کمشنر نے بی ایس ڈی آئی پروگرام کے تحت زیرِ تعمیر آپریشن تھیٹر کا بھی تفصیلی معائنہ کیا اور تعمیراتی کام کے معیار اور پیش رفت کا جائزہ لیتے ہوئے ہدایت کی کہ منصوبہ مقررہ معیار اور ضوابط کے مطابق جلد از جلد مکمل کیا جائے تاکہ عوام کو بہتر طبی سہولیات کی فراہمی ممکن ہو سکے۔

بعد ازاں بی ایچ یو کلی علی محمد اور بی ایچ یو کلی محمد خان میں انہوں نے طبی و دیگر عملے کی حاضری، مریضوں کو فراہم کی جانے والی سہولیات، صفائی ستھرائی اور ادویات کے اسٹاک کا جائزہ لیا۔

اسسٹنٹ کمشنر فتح خان بنگلزئی نے ہدایت کی کہ تمام مراکزِ صحت میں ڈاکٹرز اور دیگر ملازمین کی بروقت اور باقاعدہ حاضری یقینی بنائی جائے اور ادویات کی دستیابی برقرار رکھی جائے، اور کہا کہ مریضوں کو معیاری، بروقت اور مؤثر طبی سہولیات کی فراہمی میں کسی قسم کی غفلت یا کوتاہی برداشت نہیں کی جائے گی۔ انہوں نے کہا کہ ضلعی انتظامیہ بنیادی صحت کی سہولیات کی فراہمی، سرکاری مراکزِ صحت کی کارکردگی میں بہتری اور طبی اداروں میں نظم و ضبط کے قیام کے لیے مسلسل نگرانی جاری رکھے گی۔

تصویر: بشکریہ ڈی جی پی آر بلوچستان