گڈانی: 10 کروڑ کا آر او پلانٹ غیر فعال، کمشنر لسبیلہ سائرہ عطاء نے انکوائری رپورٹ طلب کرلی

گڈانی: کمشنر لسبیلہ ڈویژن سائرہ عطاء نے دورہ گڈانی کے موقع پر عوامی شکایات کا نوٹس لیتے ہوئے متعلقہ حکام سے مختلف امور پر رپورٹس طلب کرلیں۔

کمشنر نے بی ڈی اے کے آر او پلانٹ پراجیکٹ کا دورہ کرکے موجودہ صورتحال کا جائزہ لیا اور دس کروڑ روپے کی لاگت سے شروع کیے گئے منصوبے کی تفصیلی انکوائری رپورٹ طلب کرلی۔ حکام کے مطابق پلانٹ سے یومیہ دو لاکھ گیلن صاف پانی فراہم کیا جانا تھا، تاہم کئی سال گزرنے کے باوجود منصوبے کا مکمل آپریشنل نہ ہونا تشویشناک ہے۔

سائرہ عطاء نے منصوبے سے متعلق نیب اور اینٹی کرپشن کی انکوائریوں اور قائم کردہ انکوائری کمیٹیوں کی رپورٹس بھی طلب کیں اور ہدایت کی کہ منصوبے کی موجودہ صورتحال، اخراجات، تکمیل میں تاخیر اور متوقع عوامی فوائد سے متعلق تمام ریکارڈ پیش کیا جائے۔

دریں اثناء گڈانی آر ایچ سی کے ڈاکٹرز کی مبینہ غیر حاضری کی عوامی شکایت پر بھی کمشنر نے رپورٹ طلب کرلی۔ انہوں نے واضح کیا کہ بنیادی سہولیات کی فراہمی میں غفلت برداشت نہیں کی جائے گی، سروس ڈلیوری کی بہتری انتظامیہ کی اولین ذمہ داری ہے اور سرکاری منصوبوں کی شفافیت یقینی بنائی جائے گی۔

تصویر: بشکریہ ڈی جی پی آر بلوچستان