ڈپٹی کمشنر کیچ یاسر اقبال دشتی کا تربت چلڈرن اینڈ فیملی پارک کا دورہ، جلد کھولنے کا اعلان

تربت: ڈپٹی کمشنر کیچ یاسر اقبال دشتی نے تربت میں واقع چلڈرن اینڈ فیملی پارک کا دورہ کیا اور BSDI کے تحت پارک کی تزئین و آرائش، بحالی اور خوبصورتی کے لیے جاری ترقیاتی کاموں کا تفصیلی جائزہ لیا۔

انہوں نے پارک کے مختلف حصوں کا معائنہ کیا اور متعلقہ حکام اور کام کرنے والی ٹیم کو ہدایت کی کہ کام میں سستی یا غفلت برداشت نہیں کی جائے گی اور تمام کام مقررہ معیار کے مطابق بروقت مکمل کیے جائیں۔

ڈپٹی کمشنر نے کہا کہ یہ پارک شہریوں، بالخصوص بچوں اور خاندانوں کے لیے تفریح کا اہم مرکز ہے، اس لیے کام کے معیار کو ہر صورت یقینی بنایا جائے اور بنیادی سہولیات، صفائی ستھرائی، خوبصورتی اور بہتر ماحول پر خصوصی توجہ دی جائے۔

انہوں نے کہا کہ چلڈرن اینڈ فیملی پارک کو بہت جلد عوام کے لیے کھول دیا جائے گا، اور باقی ماندہ کام جلد مکمل کرنے کی ہدایت کی۔ ان کا کہنا تھا کہ ضلعی انتظامیہ کیچ بہتر شہری و تفریحی سہولیات کے لیے اقدامات جاری رکھے گی اور ترقیاتی منصوبوں میں معیار اور شفافیت پر سمجھوتہ نہیں ہوگا۔

تصویر: بشکریہ ڈی جی پی آر بلوچستان