نصیرآباد: محکمہ صحت کی آسامیوں پر بھرتی، ڈپٹی کمشنر وریندر لعل کی سربراہی میں انٹرویوز

نصیرآباد: محکمہ صحت ضلع نصیرآباد کی مختلف آسامیوں پر بھرتی کے سلسلے میں امیدواروں کے انٹرویوز ڈپٹی کمشنر نصیرآباد و چیئرمین سلیکشن کمیٹی وریندر لعل کی زیر صدارت ٹراما سینٹر نصیرآباد میں ہوئے۔ پینل میں ڈسٹرکٹ ہیلتھ آفیسر، ڈسٹرکٹ سپورٹ منیجر، میڈیکل سپرنٹنڈنٹ اور دیگر متعلقہ ارکان شامل تھے۔

بالخصوص BPS-01 تا BPS-15 کی آسامیوں کے امیدواروں کے انٹرویوز مقررہ طریقہ کار اور شفافیت کے اصولوں کے مطابق لیے گئے۔ امیدواروں کی تعلیمی قابلیت، تجربے، اہلیت اور دیگر مقررہ معیار کا جائزہ لیا گیا، ہر امیدوار کو اپنی صلاحیت پیش کرنے کا مساوی موقع دیا گیا اور کوائف و دستاویزات کی بھی جانچ کی گئی۔

وریندر لعل نے کہا کہ بھرتی کے عمل میں شفافیت، میرٹ اور غیر جانب داری ہر صورت یقینی بنائی جائے گی، کسی امیدوار کے ساتھ ناانصافی یا امتیازی سلوک نہیں ہوگا اور میرٹ پر پورا اترنے والے امیدوار ہی منتخب ہوں گے۔ انہوں نے پینل ارکان کو بھی غیر جانب داری اور میرٹ ملحوظ رکھنے کی ہدایت کی اور کہا کہ اہل افراد کی تعیناتی سے اداروں کی کارکردگی اور عوام کو صحت کی سہولیات بہتر ہوں گی۔

تصویر: بشکریہ ڈی جی پی آر بلوچستان