کراچی: معروف گلوکارہ حمیرا چنا کی گاڑی چوری، مقدمہ درج

کراچی: معروف گلوکارہ حمیرا چنا کی گاڑی چوری ہونے کا واقعہ پیش آیا ہے، جہاں نامعلوم ملزم اہل خانہ کی شاپنگ کے دوران ٹویوٹا کرولا گاڑی لے اڑا۔

پولیس کے مطابق یہ واقعہ 28 اکتوبر کو کراچی کے علاقے بہادر آباد میں چار مینار چورنگی کے قریب پیش آیا۔ گاڑی چوری کا مقدمہ گلوکارہ کے شوہر نے تھانہ نیوٹاؤن میں درج کرایا ہے۔

مدعی مقدمہ کے بیان کے مطابق اہل خانہ شاپنگ کے لیے گئے ہوئے تھے کہ اس دوران نامعلوم شخص ماڈل 2010 کی ٹویوٹا کرولا چوری کرکے لے گیا۔

مقدمے میں بتایا گیا ہے کہ گاڑی میں ایک قیمتی موبائل فون، خواتین اور بچوں کے کپڑے، پرس اور دیگر سامان بھی موجود تھا۔

پولیس حکام کے مطابق گاڑی چوری کا مقدمہ تھانہ نیوٹاؤن میں درج کرلیا گیا ہے اور گاڑی کی تلاش جاری ہے۔