لوک میلہ 2026 27 نومبر سے اسلام آباد کے لوک ورثہ شکرپڑیاں میں شروع ہوگا

اسلام آباد: پاکستان کے رنگا رنگ ثقافتی ورثے، علاقائی روایات اور لوک فنون کو اجاگر کرنے کے لیے ملک کے سب سے بڑے سالانہ ثقافتی میلے لوک میلہ 2026 کا انعقاد 27 نومبر سے 6 دسمبر تک لوک ورثہ شکرپڑیاں میں کیا جائے گا۔

دس روز تک جاری رہنے والے میلے میں ملک کے مختلف صوبوں اور خطوں کی تہذیب و ثقافت، روایتی کھانوں، موسیقی، دستکاریوں اور علاقائی فنون کی عکاسی کی جائے گی۔

ثقافتی پویلینز اور سرگرمیاں

میلے میں پنجاب، سندھ، بلوچستان، خیبر پختونخوا، آزاد کشمیر اور گلگت بلتستان کے ثقافتی پویلینز ہوں گے، جہاں روایتی زندگی، طرز تعمیر، ملبوسات، دستکاریوں اور مقامی ہنر کو نمایاں کیا جائے گا۔

علاقائی کھانوں کے خصوصی اسٹالز بھی قائم کیے جائیں گے، جبکہ موسیقی کی خصوصی شامیں، لوک موسیقی، روایتی رقص، پتلی تماشے اور بچوں کے لیے تفریحی سرگرمیاں پیش کی جائیں گی۔

میلے میں پاکستان کے نامور لوک گلوکار، موسیقار، خطاط، ہنرمند اور دستکار شرکت کریں گے، جبکہ اختتام پر ان کی دستار بندی بھی کی جائے گی۔ سفارتکار اور غیر ملکی مندوبین بھی خاص طور پر شرکت کریں گے۔