ڈپٹی کمشنر نصیر آباد وریندر لعل کو ڈویژنل ہیڈکوارٹر ہسپتال پر بریفنگ، غفلت برداشت نہ کرنے کا اعلان

نصیر آباد: ڈویژنل ہیڈکوارٹر ہسپتال کے میڈیکل سپرنٹنڈنٹ ڈاکٹر حبیب اللہ پندرانی نے ڈپٹی کمشنر نصیر آباد وریندر لعل کو ہسپتال میں دی جانے والی طبی سہولیات، مختلف شعبوں کی کارکردگی اور مجموعی انتظامی صورتحال پر تفصیلی بریفنگ دی۔

بریفنگ میں ڈپٹی کمشنر کو ادویات کی دستیابی، زچہ و بچہ کی صحت کے لیے اقدامات، او پی ڈی میں روزانہ آنے والے مریضوں کی تعداد، آپریشن تھیٹر کی کارکردگی، ڈاکٹرز اور پیرامیڈیکل اسٹاف کی حاضری، درپیش مسائل اور جاری ترقیاتی منصوبوں کے بارے میں آگاہ کیا گیا۔

میڈیکل سپرنٹنڈنٹ نے بتایا کہ ہسپتال میں عوام کو معیاری اور بروقت طبی سہولیات کی فراہمی کے لیے تمام دستیاب وسائل بروئے کار لائے جا رہے ہیں، اور مریضوں کی بڑھتی ہوئی تعداد کے پیشِ نظر سہولیات میں مزید بہتری کے لیے عملی اقدامات جاری ہیں۔

غفلت، لاپرواہی یا کوتاہی برداشت نہیں ہوگی

ڈپٹی کمشنر وریندر لعل نے کہا کہ ڈویژنل ہیڈکوارٹر ہسپتال غریب اور نادار عوام کے لیے اہم سہارا اور امید کی کرن ہے، لہٰذا یہاں آنے والے ہر مریض کو بہترین ممکنہ علاج اور سہولیات فراہم کرنا ضلعی انتظامیہ کی اولین ذمہ داری ہے۔ انہوں نے واضح کیا کہ ڈاکٹرز اور پیرامیڈیکل اسٹاف کی تعیناتی کا بنیادی مقصد عوام کی خدمت اور ان کے مسائل کا بروقت حل ہے، اس لیے کسی قسم کی غفلت، لاپرواہی یا کوتاہی ہرگز برداشت نہیں کی جائے گی۔

ڈپٹی کمشنر نے ہدایت کی کہ تمام ڈاکٹرز اور عملہ اپنی ذمہ داریاں ایمانداری، پیشہ ورانہ مہارت اور احساسِ ذمہ داری سے انجام دیں، مریضوں سے ہمدردانہ اور خوش اخلاق رویہ اپنائیں اور علاج کے تمام مراحل میں اعلیٰ معیار یقینی بنائیں۔ انہوں نے کہا کہ جب مریض علاج کے بعد مطمئن ہو کر جائیں اور انتظامیہ کو دعائیں دیں تو یہی اس بات کا واضح ثبوت ہوگا کہ عملہ اپنی ذمہ داریاں احسن انداز میں نبھا رہا ہے۔

انہوں نے ادویات کی فراہمی کے نظام کو مزید مؤثر بنانے کی ہدایت کرتے ہوئے کہا کہ ہسپتال میں موجود ادویات اور ان کی تقسیم کا مکمل اور شفاف ریکارڈ رکھا جائے۔ آخر میں انہوں نے ہسپتال انتظامیہ کو درپیش مسائل کے فوری حل اور جاری ترقیاتی منصوبوں کی بروقت تکمیل کے لیے ہر ممکن تعاون کی یقین دہانی کرائی اور متعلقہ حکام کو مؤثر اقدامات کی ہدایت بھی کی۔

تصویر: بشکریہ ڈی جی پی آر بلوچستان