قومی اسمبلی کا اجلاس 16 نومبر کو طلب، آئی ایم ایف بلز سمیت اہم قانون سازی متوقع

اسلام آباد: قومی اسمبلی کا اجلاس 16 نومبر کو طلب کرنے کا فیصلہ کر لیا گیا ہے، جس میں عالمی مالیاتی فنڈ (آئی ایم ایف) سے متعلق بلز سمیت اہم قانون سازی کیے جانے کا امکان ہے۔

اس سلسلے میں وزارت پارلیمانی امور نے اجلاس بلانے کی سمری وزیراعظم کو ارسال کر دی ہے۔

پارلیمانی ذرائع کے مطابق سمری وزیراعظم کو بھجوائی گئی ہے، جس کے بعد صدر مملکت وزیراعظم کی ایڈوائس پر قومی اسمبلی کا اجلاس طلب کریں گے۔

ذرائع کا کہنا ہے کہ 16 نومبر کو شروع ہونے والے اجلاس میں آئی ایم ایف سے متعلقہ بلز سمیت مختلف اہم قانونی معاملات زیرِ غور آئیں گے اور حکومت کی جانب سے اہم قانون سازی کی جائے گی۔

اجلاس کے ایجنڈے اور قانون سازی سے متعلق مزید تفصیلات سامنے آنا باقی ہیں۔