عالمی شہرت یافتہ مصری قرّاء کرام پاکستان پہنچ گئے، وفاقی وزیر مذہبی امور کا خیر مقدم

قاری ایوب عاصف، قاری طہٰ نعمانی، قاری ابراہیم عاصف، قاری ماہر الشناوی اور قاری اسماعیل عاصف پاکستان پہنچ گئے ہیں۔

اس موقع پر وفاقی وزیر مذہبی امور سردار محمد یوسف نے کہا کہ پاکستانی قوم قرآنِ کریم، قرّاء اور خدامِ قرآن سے گہری محبت اور عقیدت رکھتی ہے، مصری قرّاء کرام کی پاکستان آمد اہلِ پاکستان کے لیے باعثِ مسرت اور اعزاز ہے۔

سردار محمد یوسف اور دیگر شرکاء نے مصری قرّاء کرام سے ان کی دلنشیں آوازوں میں تلاوتِ قرآنِ کریم سننے کا شرف حاصل کیا۔

وفاقی وزیر مذہبی امور نے کہا کہ اہلِ پاکستان عالمی شہرت یافتہ مصری قرّاء کرام کی روح پرور تلاوت سے مستفید ہوں گے، ان کی پاکستان آمد سے عوام کو قرآنِ کریم کی خوبصورت تلاوت سننے کا موقع ملے گا۔

انہوں نے بتایا کہ مصری قرّاء کرام 5 ستمبر کو بعد نمازِ عصر فیصل مسجد اسلام آباد میں عظیم الشان محفلِ حسنِ قرأت میں شرکت کریں گے، فیصل مسجد میں محفلِ حسنِ قرأت عامۃ الناس کے لیے منعقد کی جائے گی۔

سردار محمد یوسف نے کہا کہ یہ اجتماع قرآنِ کریم کے پیغام، محبت اور اسلامی اخوت کے فروغ کا ذریعہ بنے گا۔