شیرانی: ڈپٹی کمشنر کلیم اللہ کاکڑ کی زیرِ صدارت پولیو مہم کے پہلے روز ایوننگ ریویو میٹنگ

شیرانی: ضلع شیرانی میں جاری انسدادِ پولیو مہم کے پہلے روز کی کارکردگی کا جائزہ لینے کے لیے ڈپٹی کمشنر شیرانی کلیم اللہ کاکڑ کی زیرِ صدارت ایوننگ ریویو میٹنگ (ERM) منعقد ہوئی، جس میں فیلڈ ٹیموں کی کارکردگی، بچوں کی کوریج، ٹیموں کی حاضری اور درپیش مسائل کا جائزہ لیا گیا۔

اجلاس میں محکمہ صحت، انسدادِ پولیو پروگرام، عالمی ادارہ صحت (WHO) اور دیگر اداروں کے نمائندوں نے شرکت کی اور ڈپٹی کمشنر کو مختلف علاقوں میں ٹیموں کی سرگرمیوں اور کوریج پر بریفنگ دی۔

ڈپٹی کمشنر نے ہدایت کی کہ پانچ سال تک عمر کے ہر بچے تک رسائی ہر صورت یقینی بنائی جائے اور کہا کہ کسی بھی علاقے یا بچے کا مہم سے رہ جانا قابلِ قبول نہیں ہوگا۔ انہوں نے ٹیموں کی روزانہ نگرانی اور کم کوریج والے علاقوں میں فوری ری وزٹ اور خصوصی ٹیموں کے ذریعے رہ جانے والے بچوں کو ویکسین پلانے کی ہدایت کی۔

انہوں نے کہا کہ انکاری والدین، دور دراز علاقوں، نقل مکانی کرنے والے خاندانوں اور مشکل رسائی والے علاقوں پر خصوصی توجہ ضروری ہے۔ انہوں نے کہا کہ پولیو بچوں کو مستقل معذوری سے دوچار کرنے والا مرض ہے جس سے موثر ویکسینیشن کے ذریعے بچاؤ ممکن ہے، اور والدین ہر مہم میں اپنے بچوں کو قطرے ضرور پلوائیں۔

کلیم اللہ کاکڑ نے مانیٹرنگ، ڈیٹا کی درست رپورٹنگ اور کوریج کے اعداد و شمار میں مکمل شفافیت برقرار رکھنے کی ہدایت کی اور کہا کہ محض کاغذی کارروائی کے بجائے فیلڈ میں حقیقی کوریج کو ترجیح دی جائے۔ انہوں نے کہا کہ بچوں کا محفوظ مستقبل سب کی مشترکہ ذمہ داری ہے اور پولیو کے مکمل خاتمے تک جدوجہد جاری رہے گی۔

تصویر: بشکریہ ڈی جی پی آر بلوچستان