راشد منہاس شہید نے وطن کے دفاع اور قومی وقار کے لیے جان قربان کی: وزیراعظم

اسلام آباد: وزیراعظم محمد شہباز شریف نے پائلٹ آفیسر راشد منہاس شہید (نشانِ حیدر) کی 55 ویں برسی پر انہیں خراجِ عقیدت پیش کرتے ہوئے کہا ہے کہ ان کی عظیم قربانی جرات، حب الوطنی اور فرض شناسی کی ایسی مثال ہے جو کبھی ماند نہیں پڑے گی۔

جمعرات کو جاری اپنے پیغام میں وزیراعظم نے کہا کہ راشد منہاس شہید نے وطن کے دفاع اور قومی وقار کے لیے اپنی جان قربان کی، اور ان کی بے مثال بہادری قوم اور افواجِ پاکستان کے لیے ہمیشہ مشعلِ راہ رہے گی۔

وزیراعظم نے شہید کے درجات کی بلندی کے لیے دعا کی اور کہا کہ قوم اپنے شہدا کی قربانیوں کو ہمیشہ یاد رکھے گی۔ انہوں نے پاکستان کی خودمختاری، علاقائی سالمیت اور قومی مفادات کے تحفظ کے عزم کا بھی اعادہ کیا۔