دکی: ڈپٹی کمشنر فضل الرحمن کبدانی کی زیر صدارت ڈسٹرکٹ کمپنسیشن کمیٹی اجلاس، کیسز میرٹ پر نمٹانے کی ہدایت

دکی: ڈپٹی کمشنر دکی فضل الرحمن کبدانی کی زیر صدارت ڈسٹرکٹ کمپنسیشن کمیٹی کا اہم اجلاس ہوا، جس میں متاثرہ خاندانوں اور مستحق افراد کے کمپنسیشن سے متعلق کیسز کا تفصیلی جائزہ لیا گیا۔

اجلاس میں ایس پی دکی منصور احمد بزدار، چیف آفیسر میونسپل کمیٹی سمندر خان ناصر، خزانہ آفیسر عبدالباقی، محکمہ لائیو اسٹاک کے نمائندوں اور دیگر محکموں کے افسران نے شرکت کی۔

کمیٹی نے پیش کیے گئے کیسز کا انفرادی جائزہ لیا اور دستاویزی ریکارڈ، قانونی تقاضوں، حکومتی پالیسی، مقررہ ضوابط اور مستحقین کی اہلیت کو مدنظر رکھتے ہوئے میرٹ اور شفافیت کی بنیاد پر ضروری فیصلے کیے۔

ڈپٹی کمشنر نے کہا کہ متاثرہ اور مستحق خاندانوں کو دی جانے والی مالی معاونت ان کا جائز حق ہے اور ضلعی انتظامیہ اپنی ذمہ داریوں سے بخوبی آگاہ ہے۔ کمپنسیشن کے تمام معاملات میں مکمل شفافیت، غیر جانبداری اور میرٹ یقینی بنایا جائے تاکہ حقیقی مستحقین تک حکومتی امداد بروقت پہنچ سکے۔

انہوں نے ہدایت کی کہ زیر التوا کیسز کی جانچ پڑتال کا عمل مزید مؤثر اور تیز کیا جائے اور تمام دستاویزات کی مکمل تصدیق کے بعد قواعد کے مطابق کارروائی کی جائے۔ انہوں نے واضح کیا کہ سرکاری وسائل کا شفاف اور منصفانہ استعمال ہر صورت یقینی بنایا جائے گا، اور امید ظاہر کی کہ تمام ادارے باہمی تعاون سے کمپنسیشن کے معاملات بروقت نمٹانے میں فعال کردار ادا کریں گے۔

اجلاس کے اختتام پر فیصلہ کیا گیا کہ تمام متعلقہ محکمے کمپنسیشن کیسز سے متعلق معلومات اور دستاویزات بروقت فراہم کریں گے تاکہ مستحق افراد کو حکومتی پالیسی کے مطابق ان کا حق بلا تاخیر مل سکے۔

تصویر: بشکریہ ڈی جی پی آر بلوچستان