دکی شہر میں میونسپل کمیٹی کا صفائی آپریشن جاری، ڈی سی فضل الرحمن کبدانی کا غفلت برداشت نہ کرنے کا اعلان

دکی: ڈپٹی کمشنر دکی فضل الرحمن کبدانی کی خصوصی ہدایت پر شہر میں صفائی ستھرائی کا نظام مزید مؤثر بنانے کے لیے میونسپل کمیٹی دکی کا صفائی آپریشن تسلسل سے جاری ہے۔

چیف آفیسر میونسپل کمیٹی سمندر خان ناصر کی نگرانی میں میونسپل عملہ شہر کے مختلف علاقوں، اہم شاہراہوں، بازاروں اور عوامی مقامات سے کچرا اٹھانے اور تلف کرنے میں مصروف ہے۔ اسی سلسلے میں ایکسچینج دفتر کے سامنے جمع کچرے کے ڈھیر کو اسکیڈ لوڈر کے ذریعے اٹھا کر علاقے کی صفائی کی گئی۔

سمندر خان ناصر نے عملے کو ہدایت کی کہ شہر میں صفائی کا عمل باقاعدگی سے جاری رکھا جائے اور کچرے کے ڈھیروں کی بروقت صفائی یقینی بنائی جائے۔ ضلعی انتظامیہ نے اس امر پر زور دیا کہ صفائی ایک روزہ سرگرمی نہیں بلکہ مسلسل عمل ہے، جس کے لیے میونسپل کمیٹی کے تمام دستیاب وسائل بروئے کار لائے جائیں اور شہری آبادی، بازاروں اور مصروف مقامات سے کچرے کی بروقت منتقلی اور مناسب تلفی یقینی بنائی جائے۔

ڈپٹی کمشنر فضل الرحمن کبدانی نے کہا کہ صفائی ستھرائی، نکاسی آب اور صاف و صحت مند ماحول کی فراہمی ضلعی انتظامیہ کی ترجیحات میں شامل ہے۔ انہوں نے ہدایت کی کہ جہاں بھی کچرا جمع ہو وہاں فوری کارروائی کی جائے اور صفائی کے نظام میں کسی غفلت یا کوتاہی کو برداشت نہیں کیا جائے گا۔

انہوں نے شہریوں سے اپیل کی کہ وہ ضلعی انتظامیہ اور میونسپل کمیٹی سے تعاون کریں، کچرا مقررہ مقامات پر ڈالیں اور گلیوں، بازاروں اور عوامی مقامات کو صاف رکھیں۔ ضلعی انتظامیہ کے مطابق مختلف علاقوں کی نگرانی جاری رکھی جائے گی اور عوامی شکایات پر فوری صفائی کے اقدامات کیے جائیں گے۔

تصویر: بشکریہ ڈی جی پی آر بلوچستان