اُستا محمد میں پرائس کنٹرول کمیٹی کا اجلاس، اسسٹنٹ کمشنر کی تاجروں کو سرکاری نرخ نامے پر عملدرآمد کی ہدایت

اُستا محمد: ڈپٹی کمشنر محمد رمضان پلال کی خصوصی ہدایت پر اسسٹنٹ کمشنر اُستا محمد محمد رمضان اشتیاق کی زیر صدارت پرائس کنٹرول کمیٹی کا اہم اجلاس منعقد ہوا، جس میں انجمن تاجران کے نمائندوں اور متعلقہ افسران نے شرکت کی۔ اجلاس میں ضلع بھر میں اشیائے خورونوش بالخصوص آٹے کے نرخوں، مارکیٹ کی صورتحال، اشیائے ضروریہ کی دستیابی اور سرکاری نرخ ناموں پر عملدرآمد کا جائزہ لیا گیا۔

اسسٹنٹ کمشنر نے تاجر برادری کو ہدایت کی کہ سرکاری نرخ ناموں پر ہر صورت عملدرآمد کیا جائے۔ انہوں نے کہا کہ آٹا اور دیگر بنیادی اشیاء عوام کی روزمرہ ضرورت ہیں، ان کی قیمتوں میں بلاجواز اضافہ قابلِ قبول نہیں؛ ناجائز منافع خوری، ذخیرہ اندوزی اور نرخ نامے کی خلاف ورزی پر جرمانوں کے ساتھ دکانیں سیل کرنے سمیت سخت قانونی کارروائی کی جا سکتی ہے۔

انہوں نے تاجروں سے کہا کہ سرکاری نرخ نامے نمایاں جگہ آویزاں کریں اور مقررہ نرخ سے زائد وصولی نہ کریں۔ انہوں نے کہا کہ اسلام میں بھی تجارت میں دیانت داری، انصاف اور اعتدال پر زور دیا گیا ہے اور عوام کی مجبوری سے فائدہ اٹھانا ناپسندیدہ عمل ہے۔ اجلاس کے اختتام پر بازاروں میں قیمتوں کی باقاعدہ نگرانی اور خلاف ورزی کرنے والوں کے خلاف بلاامتیاز کارروائی کی ہدایت کی گئی۔

تصویر: بشکریہ ڈی جی پی آر بلوچستان