قلات: ای پی اے کی اسسٹنٹ ڈائریکٹر فائزہ کا ڈی ایچ کیو اسپتال کا معائنہ، طبی فضلے کی تلفی کا جائزہ

قلات: وزیر اعلیٰ بلوچستان میر سرفراز بگٹی کے ویژن، صوبائی مشیر ماحولیات نسیم الرحمن اور سیکرٹری ماحولیات و موسمیاتی تبدیلی نور احمد پرکانی کے احکامات اور ڈی جی ادارہ تحفظ ماحولیات ظہور بلوچ کی ہدایت پر بلوچستان انوائرنمنٹل پروٹیکشن ایجنسی ریجنل آفس قلات کی اسسٹنٹ ڈائریکٹر فائزہ نے قلات شہر کے ڈی ایچ کیو اسپتال کا تفصیلی معائنہ کیا، جس کا مقصد اسپتال میں طبی فضلے کے انتظام اور تلفی کے نظام کا جائزہ لینا تھا۔

معائنے کے دوران طبی فضلے کی علیحدگی، جمع کرنے، ذخیرہ کرنے اور تلف کرنے کے طریقہ کار، رنگوں کے مطابق مخصوص ویسٹ بنز، سرنجوں و دیگر نوکیلے طبی فضلے (Sharps) اور متعدی فضلے کی محفوظ ہینڈلنگ، انسی نیریٹر کی دستیابی و فعالیت سمیت اسپتال کی مجموعی صفائی اور سینیٹیشن کا جائزہ لیا گیا۔

اس موقع پر اسپتال کے چیف میڈیکل آفیسر ڈاکٹر محمد یعقوب اور دیگر عملے کو کہا گیا کہ تمام طبی فضلے کو مقررہ ماحولیاتی قوانین اور اسپتال ویسٹ مینجمنٹ گائیڈ لائنز کے مطابق محفوظ طریقے سے علیحدہ، ذخیرہ اور تلف کیا جائے۔

ای پی اے حکام نے واضح کیا کہ طبی فضلے کی مناسب تلفی عوامی صحت اور ماحول کے تحفظ کے لیے نہایت ضروری ہے، اس لیے اسپتال انتظامیہ ماحولیاتی قوانین اور مقررہ ضوابط پر مکمل عملدرآمد یقینی بنائے۔

تصویر: بشکریہ ڈی جی پی آر بلوچستان