کے پی کے عوام صدارتی پروکلیمیشن کا خیرمقدم کرتے ہیں، فتنہ الخوارج کا ساتھ نہیں دیں گے: گورنر کنڈی

پشاور (اعتماد ڈیسک): گورنر خیبرپختونخوا فیصل کریم کنڈی نے کہا ہے کہ صوبے کے عوام صدارتی پروکلیمیشن کا خیرمقدم کرتے ہیں اور انہوں نے فیصلہ کر لیا ہے کہ وہ مزید فتنہ الخوارج کا ساتھ نہیں دیں گے۔

صوبے کے عوام کے نام اپنے پیغام میں گورنر نے کہا کہ خیبرپختونخوا کے لوگ امن، استحکام اور خوشحالی چاہتے ہیں اور دہشت گردوں کے خلاف اپنے سیکیورٹی اداروں کے ساتھ کھڑے ہیں اور آخری دم تک یہ لڑائی لڑیں گے۔

ان کا کہنا تھا کہ عوام انتشار اور بدامنی کے بجائے پُرامن مستقبل چاہتے ہیں اور باقی صوبوں سے بھائی چارے اور تعاون کا رشتہ رکھنا چاہتے ہیں اور چاہتے ہیں کہ جمہوری اقدار پھلیں پھولیں اور ترقی کے ثمرات عام شہری تک پہنچیں۔

گورنر کنڈی نے کہا کہ خیبرپختونخوا کے عوام امن پسند ہیں اور دہشت گردی یا پُرتشدد کارروائیوں کی حمایت نہیں کرتے۔ انہوں نے عوام سے قانون شکنی، اشتعال انگیزی اور دنگے فساد سے مکمل اجتناب کی اپیل کرتے ہوئے خبردار کیا کہ جو بھی امن خراب کرے گا یا قانون اپنے ہاتھ میں لے گا، اس کے خلاف قانون کے تحت سختی سے نمٹا جائے گا۔