خیبرپختونخوا میں ایمرجنسی یا گورنر راج کی تیاری مکمل، فیصلہ حکومت اور اپوزیشن کے مذاکرات سے مشروط

اسلام آباد (اعتماد ڈیسک): خیبرپختونخوا میں ایمرجنسی یا گورنر راج کے نفاذ کے لیے تمام تیاریاں مکمل کر لی گئی ہیں، تاہم حتمی فیصلہ حکومت اور اپوزیشن کے وفود کے درمیان مذاکرات کے نتیجے پر منحصر ہوگا۔

ذرائع کے مطابق ڈپٹی کمشنرز اور سیکرٹریز سمیت انتظامی تبدیلیوں کا ہوم ورک مکمل ہے اور ریجنل اور ڈسٹرکٹ پولیس افسران کی تعیناتیوں کی فہرست بھی تیار کر لی گئی ہے۔

یہ تجویز بھی زیرِ غور ہے کہ پہلے مرحلے میں صوبے کے 12 اضلاع میں ایمرجنسی لگائی جائے۔

ذرائع کا کہنا ہے کہ اگر پاکستان تحریکِ انصاف سمیت اپوزیشن اور وفاقی حکومت کے مذاکرات کامیاب ہو گئے تو ایمرجنسی یا گورنر راج نہیں لگایا جائے گا۔ اس سلسلے میں اسلام آباد میں جلد ایک اہم اجلاس متوقع ہے۔