وزیراعلیٰ خیبرپختونخوا عدالتی حکم کے باوجود سرکاری ہیلی کاپٹر پر لکی مروت لانگ مارچ پہنچے

لکی مروت (اعتماد ڈیسک): وزیراعلیٰ خیبرپختونخوا اسلام آباد ہائیکورٹ کے احکامات کے باوجود سرکاری ہیلی کاپٹر پر پی ٹی آئی کے لانگ مارچ میں شرکت کے لیے لکی مروت پہنچ گئے۔

اسلام آباد ہائیکورٹ نے 18 ستمبر کو لانگ مارچ سے متعلق 37 صفحات کے تفصیلی فیصلے میں صوبائی حکومتوں اور وزرائے اعلیٰ پر سیاسی مارچ یا احتجاج میں سرکاری وسائل کے استعمال کی ممانعت کی تھی۔ فیصلے کی رو سے اسلام آباد کی جانب کسی بھی مارچ کے لیے سرکاری فنڈز، گاڑیاں، ہیلی کاپٹر، سرکاری اہلکار یا مشینری استعمال نہیں کی جا سکتی۔ عدالت نے پرامن احتجاج کو آئینی حق قرار دیا تھا، تاہم اسلحہ ساتھ لانے کی اجازت نہیں دی تھی۔

ادھر انٹیلیجنس ذرائع کا دعویٰ ہے کہ سوشل اور ڈیجیٹل میڈیا پر گردش کرنے والی تصاویر میں لانگ مارچ کے شرکاء میں سالٹ رائفلوں سے مسلح افراد دکھائی دے رہے ہیں۔

ذرائع کے مطابق ہتھیار کے ساتھ نظر آنے والے افراد میں سے ایک کی شناخت گل بہادر گروپ کے خارجی شہیداللہ عرف غازی کے طور پر ہوئی ہے، جو مکین کا رہائشی ہے اور متعدد دہشت گرد حملوں میں شریک رہا ہے۔ مارچ کی آڑ میں چھپے دیگر دہشت گردوں کی نشاندہی کا عمل بھی جاری ہے۔