آئی جی ایف سی نارتھ کا کوہلو کا دورہ، کھلی کچہری میں مسائل سن کر موقع پر احکامات جاری

کوہلو: آئی جی ایف سی نارتھ میجر جنرل محمد عاطف مجتبیٰ نے کوہلو کا ایک روزہ دورہ کیا۔ اس دوران انہوں نے کمانڈنٹ میوند بریگیڈ کرنل فاروق اشرف، ڈپٹی کمشنر کوہلو عظیم جان دومڑ، ڈپٹی کمشنر بارکھان عبداللہ کھوسو، قبائلی عمائدین، نوجوانوں اور مختلف شعبوں کے شہریوں کے ساتھ عوامی کھلی کچہری میں شرکت کی۔

کھلی کچہری میں کوہلو اور بارکھان کے انتظامی افسران، قبائلی رہنماؤں، عوامی نمائندوں اور شہریوں نے بڑی تعداد میں شرکت کی اور اپنے علاقوں کے مسائل پیش کیے۔

میجر جنرل عاطف مجتبیٰ نے تمام مسائل نہایت توجہ سے سنے اور متعدد شکایات پر موقع پر ہی متعلقہ حکام کو فوری احکامات جاری کیے۔ انہوں نے کہا کہ عوامی مسائل کا بروقت حل ہماری ترجیحات میں شامل ہے اور ایف سی بلوچستان سول انتظامیہ کے ساتھ مل کر کوہلو اور بارکھان میں بہتری کے لیے ہر ممکن کردار ادا کر رہی ہے۔

شرکاء سے خطاب میں انہوں نے کہا کہ کوہلو اور بارکھان کے غیور عوام امن و ترقی کے سفر میں ہمارے اصل شراکت دار ہیں۔ ان کے بقول امن و ترقی ایک دوسرے کے بغیر ممکن نہیں اور اسی مقصد کے لیے ایف سی بلوچستان، ضلعی انتظامیہ اور قبائلی عمائدین کے ساتھ مربوط حکمت عملی کے تحت کام کر رہی ہے۔

انہوں نے کہا کہ نوجوان ہمارا سرمایہ ہیں، انہیں جدید تعلیم، ہنر مند پروگراموں اور روزگار کے بہتر مواقع فراہم کرنا ہماری اولین ترجیح ہے۔

دورے کے دوران آئی جی ایف سی نارتھ نے انٹر گرلز کالج کوہلو کا معائنہ کیا اور تعلیمی سرگرمیوں، اساتذہ کی کارکردگی اور دستیاب سہولیات کا جائزہ لیا۔ انہوں نے طلباء کے لیے تعلیمی ماحول اور انفراسٹرکچر مزید بہتر بنانے کی ہدایات جاری کیں۔

بعدازاں انہوں نے کوہلو بازار کا دورہ کیا اور دکانداروں، تاجروں اور شہریوں سے ملاقات کی۔ عوام نے انہیں اپنے درمیان دیکھ کر خوشی اور اطمینان کا اظہار کیا اور علاقے میں قیام امن، عوامی رابطہ مہمات اور سماجی ہم آہنگی کے فروغ میں ایف سی کے کردار کو سراہا۔

کھلی کچہری میں کوہلو اور بارکھان کے شہریوں نے ایف سی بلوچستان کے عوام دوست اقدامات اور امن کے لیے مسلسل کوششوں کو خراج تحسین پیش کیا۔