الخدمت کراچی کے زیرِ کفالت 2400 یتیم بچوں کی سالانہ طبی جانچ مکمل

کراچی: الخدمت کراچی کے آرفن کیئر پروگرام کے تحت زیرِ کفالت 2400 یتیم بچوں کی سالانہ طبی جانچ مکمل کر لی گئی۔ آخری مرحلے میں 894 بچوں کا معائنہ کیا گیا، جبکہ ضرورت مند بچوں کو ڈاکٹروں کی تجویز کردہ ادویات اور نظر کے مطابق تیار کردہ عینکیں بھی فراہم کی گئیں۔

13 کلسٹرز سے تعلق رکھنے والے بچوں کی جانچ نارتھ کراچی، ناظم آباد، فریدہ یعقوب اسپتال اور اورنگی و کورنگی میں قائم اسپتالوں، جبکہ ملیر، شاہ فیصل اور لیاری کے طبی مراکز میں کی گئی۔ بچوں کے ساتھ ان کی مائیں اور سرپرست بھی موجود تھے۔

ماہر ڈاکٹروں نے آنکھوں، دانتوں، ناک، کان، گلے اور عمومی امراض کا معائنہ کیا۔ جن بچوں کو مزید علاج کی ضرورت تھی، انہیں الخدمت کے اسپتالوں میں علاج کی سہولت دی گئی۔ کمزور بینائی والے بچوں کو ڈاکٹروں کے تجویز کردہ نمبروں کے مطابق عینکیں بنا کر دی گئیں، جبکہ دانتوں کے علاج کے ضرورت مند بچوں کا مفت علاج بھی کیا جائے گا۔ الخدمت کے اسپتالوں کے طبی عملے نے ڈاکٹروں کی معاونت کی۔

انتظامات کا جائزہ

آخری مرحلے میں الخدمت کراچی کے ایگزیکٹو ڈائریکٹر راشد قریشی نے ناظم آباد کے کیمپ کا دورہ کیا، جبکہ ڈائریکٹر آرفن کیئر پروگرام یوسف محی الدین نے ملیر کے کیمپ کا دورہ کیا۔ انہوں نے ڈاکٹروں، بچوں اور سرپرستوں سے ملاقات کی اور انتظامات کا جائزہ لیا۔

راشد قریشی نے کہا کہ الخدمت زیرِ کفالت بچوں کی کفالت کے ساتھ ان کی صحت کا بھی بھرپور خیال رکھتی ہے۔ اسی مقصد کے تحت شہر کے مختلف علاقوں میں اسپتالوں اور طبی مراکز میں باقاعدگی سے طبی کیمپ لگائے جاتے ہیں، جہاں ماہر ڈاکٹر بچوں کا معائنہ کرتے ہیں اور کسی مرض کی تشخیص پر علاج کی سہولت بھی فراہم کی جاتی ہے۔ انہوں نے کہا کہ باہمت بچوں کی سالانہ طبی جانچ کا سلسلہ باقاعدگی سے جاری ہے۔

یوسف محی الدین نے کہا کہ آرفن کیئر پروگرام بچوں کی تعلیم، صحت اور غیر نصابی سرگرمیوں پر توجہ دیتا ہے تاکہ انہیں معاشرے کا بہترین شہری بنایا جا سکے۔ یتیم بچے معاشرے کا اہم حصہ ہیں اور ان کی دیکھ بھال پوری قوم کی ذمہ داری ہے۔