ژوب میں ایک ماہ کی خصوصی صفائی مہم، تین ٹیمیں تشکیل؛ نالیوں میں کچرا پھینکنے والے دکانداروں کو وارننگ

ژوب: ضلعی انتظامیہ ژوب اور میونسپل کمیٹی کی جانب سے شہر میں صفائی کے نظام کو مزید مؤثر بنانے کے لیے خصوصی صفائی مہم جاری ہے، جو اسسٹنٹ کمشنر ژوب محمد نوید عالم اور چیف آفیسر میونسپل کمیٹی ژوب جہانگیر خان کی نگرانی میں چلائی جا رہی ہے۔

مہم کے دوران آج بابو محلہ، این-50 کمال خان چوک تا شاہین چوک، چائنا روڈ، جیل روڈ اور نیو آبادی نزد شیخان ٹاؤن میں مین نالیوں، شاہراہوں اور گلیوں کی صفائی کی گئی اور سڑکوں کے اطراف جمع کچرا ہٹایا گیا۔

صفائی کے لیے تین خصوصی ٹیمیں تشکیل دی گئی ہیں جو بیک وقت مختلف علاقوں میں کام کر رہی ہیں؛ ان میں سے ایک ٹیم کو بند اور گندگی سے بھری نالیوں کی صفائی کی ذمہ داری دی گئی ہے تاکہ نکاسیٔ آب بہتر ہو اور پانی جمع ہونے کے مسائل کم ہوں۔ ضلعی انتظامیہ کے مطابق مہم پورا ایک ماہ جاری رہے گی۔

انتظامیہ کے مشاہدے کے مطابق مین شاہراہوں پر واقع بعض دکانوں سے کوڑا کرکٹ براہِ راست مین نالیوں میں پھینکا جا رہا ہے، جس سے نالیاں بند ہو جاتی ہیں۔ ایسے دکانداروں کو سخت وارننگ جاری کی گئی ہے، اور خلاف ورزی کرنے والوں کے خلاف ضابطے کے مطابق کارروائی ہوگی۔

اسسٹنٹ کمشنر اور چیف آفیسر نے صفائی ٹیموں کو روزانہ کی بنیاد پر نگرانی کی ہدایت کی۔ انتظامیہ نے شہریوں اور تاجروں سے اپیل کی کہ وہ کوڑا کرکٹ مقررہ مقامات پر ڈالیں، کیونکہ شہر کو صاف رکھنے کی ذمہ داری صرف انتظامیہ یا میونسپل کمیٹی کی نہیں بلکہ تمام طبقات کی ہے۔

تصویر: بشکریہ ڈی جی پی آر بلوچستان