ڈی جی سوشل ویلفیئر سیف اللہ کھیتران نے آل پاکستان مقابلوں میں کامیاب خصوصی بچوں میں میڈلز اور ٹرافیاں تقسیم کیں

کوئٹہ: ڈائریکٹر جنرل سوشل ویلفیئر بلوچستان میر سیف اللہ خان کھیتران نے کہا ہے کہ خصوصی بچے کسی بھی معاشرے پر بوجھ نہیں بلکہ ہماری طاقت، صلاحیت اور قومی اثاثہ ہیں، اور ان کی حوصلہ افزائی اور سرپرستی حکومت سمیت معاشرے کی مشترکہ ذمہ داری ہے۔

انہوں نے یہ بات ڈیف ریچ اسکول کوئٹہ کے دورے کے موقع پر آل پاکستان اسپیشل چلڈرن اسپورٹس مقابلوں میں بلوچستان کی نمائندگی کرنے والی خصوصی بچوں کی مختلف کھیلوں کی ٹیموں سے ملاقات میں کہی۔ ان مقابلوں میں بلوچستان کے خصوصی بچوں نے شاندار کارکردگی دکھاتے ہوئے نمایاں پوزیشنز حاصل کیں اور میڈلز، شیلڈز اور ٹرافیاں جیت کر صوبے کا نام قومی سطح پر روشن کیا۔

ڈی جی سوشل ویلفیئر نے کامیاب کھلاڑیوں کو مبارکباد دی اور ان میں میڈلز، شیلڈز اور ٹرافیاں تقسیم کیں۔ انہوں نے کہا کہ خصوصی بچوں نے ثابت کر دیا ہے کہ اگر انہیں مناسب مواقع، سہولیات اور حوصلہ افزائی فراہم کی جائے تو وہ قومی اور بین الاقوامی سطح پر ملک و صوبے کا نام روشن کر سکتے ہیں، اور عزم و حوصلہ ہو تو کوئی رکاوٹ کامیابی کی راہ میں حائل نہیں ہو سکتی۔

ہمدردی نہیں، برابری کے مواقع

میر سیف اللہ خان کھیتران نے کہا کہ خصوصی بچوں کو محض ہمدردی نہیں بلکہ برابری کے مواقع، اعتماد، تعلیم، تربیت، کھیلوں کی سہولیات اور عملی میدان میں آگے بڑھنے کے مواقع درکار ہیں۔ محکمہ سوشل ویلفیئر بلوچستان خصوصی افراد کی فلاح و بہبود، ان کے حقوق کے تحفظ اور انہیں معاشرے کا فعال اور بااختیار حصہ بنانے کے لیے مختلف اقدامات کر رہا ہے۔

انہوں نے کہا کہ کھیل خصوصی بچوں کی جسمانی صحت کے ساتھ ساتھ ان میں خود اعتمادی، نظم و ضبط، ٹیم ورک اور قائدانہ صلاحیتیں پیدا کرنے کا بہترین ذریعہ ہیں۔ ان بچوں کی کامیابی صرف چند میڈلز یا ٹرافیوں تک محدود نہیں بلکہ پورے معاشرے کے لیے پیغام ہے کہ صلاحیت کسی جسمانی رکاوٹ کی محتاج نہیں ہوتی۔

ڈی جی سوشل ویلفیئر نے خصوصی بچوں کے والدین، اساتذہ، کوچز اور منتظمین کو بھی مبارکباد دی اور کہا کہ بچوں کی کامیابی کے پیچھے ان کی مسلسل محنت، تربیت اور حوصلہ افزائی کا بنیادی کردار ہے۔ انہوں نے کامیاب کھلاڑیوں کو یقین دلایا کہ محکمہ ان کی سرپرستی اور حوصلہ افزائی کا سلسلہ جاری رکھے گا اور خصوصی افراد کی صلاحیتیں اجاگر کرنے کے لیے ہر ممکن اقدامات کیے جائیں گے۔

تصویر: بشکریہ ڈی جی پی آر بلوچستان