شہداء کی قربانیوں سے سبق حاصل کرنا ہے: ڈپٹی کمشنر قلات عائشہ زہری کی یوم دفاع ریلی سے گفتگو

قلات: ڈپٹی کمشنر قلات انجینئر عائشہ زہری نے کہا ہے کہ ہائی اور ہائر سیکنڈری اسکولوں کے طلبہ میں وطن سے محبت، قومی یکجہتی اور دفاعِ وطن کے جذبے کو ملی نغموں، ٹیبلوز، اردو و انگریزی تقاریر اور حمد و نعت کے مقابلوں کے ذریعے اجاگر کیا جا رہا ہے۔

انہوں نے بتایا کہ کمشنر خضدار ڈویژن کے احکامات کی روشنی میں یوم دفاع کی تقریبات کے پرامن انعقاد کے لیے خصوصی سیکیورٹی پلان بھی ترتیب دیا گیا ہے۔

ڈپٹی کمشنر نے کہا کہ یہ دن 1965 کے ان لمحات کی یاد دلاتا ہے جب مسلح افواج نے غیر معمولی عزم، جرات اور قربانی کا مظاہرہ کیا۔ «ہمیں اپنے شہداء کو صرف یاد ہی نہیں کرنا بلکہ ان کی قربانیوں سے سبق بھی حاصل کرنا ہے۔ وطن کی سلامتی صرف سرحدوں پر لڑنے والے جوانوں کی ذمہ داری نہیں بلکہ ہر شہری اپنے کردار سے پاکستان کو مضبوط بنا سکتا ہے۔» ریلی میں ایس پی قلات، اسسٹنٹ کمشنر قلات، انتظامی افسران اور شہریوں نے بڑی تعداد میں شرکت کی۔

تصویر: بشکریہ ڈی جی پی آر بلوچستان