شیرانی: ڈپٹی کمشنر کلیم اللہ کاکڑ نے مانی خواہ میں بینظیر کسان کارڈ کا افتتاح کر دیا

شیرانی: ڈپٹی کمشنر شیرانی کلیم اللہ کاکڑ نے مانی خواہ میں بینظیر کسان کارڈ کا باقاعدہ افتتاح کر دیا۔ اس موقع پر ڈپٹی ڈائریکٹر زراعت امیر شاہ شیرانی، اسسٹنٹ کمشنر گل نواز، اسسٹنٹ کمشنر حبیب الرحمان ناصر، زمیندار ایکشن کمیٹی کے چیئرمین صبا خان شیرانی سمیت مختلف محکموں کے افسران، زمینداران اور کسانوں نے شرکت کی۔

تقریب سے خطاب کرتے ہوئے ڈپٹی کمشنر کلیم اللہ کاکڑ نے کہا کہ زرعی شعبہ ملکی معیشت اور دیہی آبادی کے روزگار میں بنیادی اہمیت رکھتا ہے، جبکہ کسان ملکی غذائی ضروریات پوری کرنے میں کلیدی کردار ادا کرتے ہیں۔ کسانوں کو جدید زرعی سہولیات، ضروری وسائل اور بروقت معاونت کی فراہمی سے زرعی پیداوار میں مزید اضافہ کیا جا سکتا ہے۔

انہوں نے بینظیر کسان کارڈ کے اجرا کو کسانوں کی سہولت اور زرعی شعبے کی بہتری کی جانب اہم اقدام قرار دیتے ہوئے کہا کہ اس پروگرام کا مقصد کسانوں تک زرعی سہولیات اور معاونت کی رسائی کو آسان بنانا ہے۔ انہوں نے ہدایت کی کہ کسانوں کو کسان کارڈ کے طریقہ کار، رجسٹریشن اور دستیاب سہولیات کے بارے میں مکمل آگاہی فراہم کی جائے تاکہ زیادہ سے زیادہ مستحق کاشتکار اس سے فائدہ اٹھا سکیں۔

ڈپٹی کمشنر نے کہا کہ ضلع شیرانی میں زراعت کے فروغ کے لیے تمام متعلقہ محکموں کے درمیان مربوط روابط اور مؤثر اقدامات ضروری ہیں۔ انہوں نے محکمہ زراعت کے افسران پر زور دیا کہ وہ فیلڈ میں موجود رہیں، کسانوں کے مسائل سنیں اور ان کے حل کے لیے عملی اقدامات کریں۔

ڈپٹی ڈائریکٹر زراعت امیر شاہ شیرانی نے ضلع میں زرعی سرگرمیوں، کسانوں کو فراہم کی جانے والی سہولیات اور کسان کارڈ کے حوالے سے بریفنگ دی اور کہا کہ کسانوں کی رہنمائی اور انہیں جدید زرعی طریقوں سے روشناس کرانے کے لیے محکمہ زراعت کے اقدامات جاری ہیں۔ زمیندار ایکشن کمیٹی کے نمائندگان اور دیگر شرکاء نے بھی کسانوں کے مسائل اور زرعی شعبے کی ضروریات پر خیالات کا اظہار کیا۔

ڈپٹی کمشنر کلیم اللہ کاکڑ نے عزم ظاہر کیا کہ ضلع شیرانی میں زراعت کے فروغ، کسانوں کی سہولت اور زرعی پیداوار میں اضافے کے لیے ضلعی انتظامیہ متعلقہ محکموں کے ساتھ مل کر ہر ممکن تعاون جاری رکھے گی۔

تصویر: بشکریہ ڈی جی پی آر بلوچستان