اسسٹنٹ کمشنر ابوبکر میروانی کا ٹیچنگ ہسپتال تربت کا اچانک دورہ، او پی ڈی میں ڈاکٹرز کی حاضری کا حکم

تربت: ڈپٹی کمشنر کیچ یاسر اقبال دشتی کی ہدایت پر اسسٹنٹ کمشنر ابوبکر میروانی نے ٹیچنگ ہسپتال تربت کا اچانک دورہ کیا اور طبی سہولیات، عملے کی حاضری اور صفائی کی صورتحال کا جائزہ لیا۔ میڈیکل سپرنٹنڈنٹ ڈاکٹر عبدالوحید بلیدی، ڈپٹی ڈی ایچ او ڈاکٹر محسن منیر بلیدی اور ویکسینیشن کے ڈسٹرکٹ سپرنٹنڈنٹ ڈاکٹر عبداللطیف بھی ان کے ہمراہ تھے۔

انہوں نے ایمرجنسی وارڈ اور او پی ڈی سمیت مختلف شعبوں کا دورہ کیا اور ہدایت کی کہ صبح 9 بجے سے دوپہر 2 بجے تک او پی ڈی میں تمام ڈاکٹرز کی موجودگی ہر صورت یقینی بنائی جائے تاکہ دور دراز سے آنے والے مریضوں کو بروقت علاج ملے۔ پیرامیڈیکل اسٹاف کو مقررہ اوقات میں مکمل وردی کے ساتھ فرائض انجام دینے کی ہدایت کی گئی۔

اسسٹنٹ کمشنر نے صفائی کو اولین ترجیح قرار دیتے ہوئے تمام وارڈز، او پی ڈی، ایمرجنسی اور راہداریوں کو صاف رکھنے اور صفائی کے عملے کی حاضری یقینی بنانے کا کہا۔ ایم ایس ڈاکٹر عبدالوحید بلیدی نے بجلی کی لوڈشیڈنگ سمیت ہسپتال کے انتظامی مسائل پر بریفنگ دی، جس پر اسسٹنٹ کمشنر نے یقین دلایا کہ ان مسائل سے ضلعی انتظامیہ کو آگاہ کیا جائے گا اور حل کے لیے متعلقہ حکام سے رابطہ کیا جائے گا۔

تصویر: بشکریہ ڈی جی پی آر بلوچستان