یونیورسٹی آف لورالائی میں ایف اے او کے تحت کسانوں میں مکئی کے بیج کی تقسیم، یورپی یونین کی معاونت

لورالائی: یونیورسٹی آف لورالائی میں فوڈ اینڈ ایگریکلچر آرگنائزیشن (FAO) کے زیرِ اہتمام «Revival of Balochistan Water Resources Programme» کے تحت چارہ جات (مکئی) کے بیج کی تقسیم کی تقریب منعقد ہوئی۔ اس پروگرام کو یورپی یونین (EU) کی مالی معاونت حاصل ہے۔

تقریب میں وائس چانسلر پروفیسر ڈاکٹر احسان اللہ کاکڑ نے خصوصی شرکت کی جبکہ ان کے ہمراہ پی ایس او ٹو وائس چانسلر ڈاکٹر خالد خان بھی موجود تھے۔ ایف اے او کی دعوت پر وائس چانسلر نے مقامی مستحق کسانوں اور مستفیدین میں بیج تقسیم کیے۔

وائس چانسلر نے مقامی کاشتکاروں کی معاونت، مویشیوں کے لیے معیاری چارے کی دستیابی اور پائیدار زرعی طریقوں کے فروغ کے لیے ایف اے او اور یورپی یونین کی کاوشوں کو سراہا۔ انہوں نے کہا کہ زرعی ترقی اور کسانوں کو جدید سہولیات کی فراہمی مقامی معیشت کو مضبوط بنانے کے ساتھ مویشی پالنے والوں کے لیے بھی بہتر مواقع پیدا کرتی ہے۔

ان کا کہنا تھا کہ لورالائی جیسے زرعی و مالداری سے وابستہ علاقوں میں معیاری چارہ بیج کی فراہمی سے کسانوں اور مالداروں کو فائدہ پہنچے گا اور لائیو اسٹاک کے شعبے کو فروغ ملے گا۔ شرکاء نے ان اقدامات کو خوش آئند قرار دیتے ہوئے امید ظاہر کی کہ ایسے منصوبوں کا دائرہ مزید وسیع کیا جائے گا تاکہ ضلع لورالائی کے زیادہ سے زیادہ کسان اور مالدار مستفید ہو سکیں۔

تصویر: بشکریہ ڈی جی پی آر بلوچستان