لورالائی: اسسٹنٹ کمشنر ندیم اکرم کا بینظیر انکم سپورٹ پروگرام کے مراکز کا دورہ، مستحقین سے ملاقات

لورالائی: ڈپٹی کمشنر لورالائی محمد حسیب شجاع کی خصوصی ہدایت پر اسسٹنٹ کمشنر لورالائی ندیم اکرم نے شہر میں قائم بینظیر انکم سپورٹ پروگرام (BISP) کے مختلف مراکز اور برانچز کا تفصیلی دورہ کر کے انتظامی امور، مستحقین کو فراہم کی جانے والی سہولیات اور امدادی رقوم کی ادائیگی کے نظام کا جائزہ لیا۔

دورے کے دوران اسسٹنٹ کمشنر نے مراکز کے عملے سے ملاقات کی اور رجسٹرڈ مستحق خاندانوں کو فراہم کی جانے والی مالی معاونت اور دیگر سہولیات سے متعلق تفصیلات حاصل کیں۔ انہوں نے مراکز پر موجود مستحق خواتین اور دیگر شہریوں سے بھی ملاقات کر کے ان کے مسائل دریافت کیے۔

اسسٹنٹ کمشنر نے عملے کو ہدایت کی کہ مستحقین، بالخصوص خواتین اور بزرگ شہریوں کے لیے بہتر اور باعزت ماحول فراہم کیا جائے، اور مراکز پر آنے والے افراد کے ساتھ خوش اخلاقی اور احترام سے پیش آنا عملے کی بنیادی ذمہ داری ہے۔

ندیم اکرم نے کہا کہ بینظیر انکم سپورٹ پروگرام حکومت کا اہم فلاحی منصوبہ ہے جس کا مقصد کمزور اور مستحق طبقات کو مالی معاونت فراہم کرنا ہے، لہٰذا خدمات کی فراہمی میں مکمل شفافیت، میرٹ اور قانون کی پاسداری یقینی بنائی جائے۔ انہوں نے واضح کیا کہ امدادی رقوم کی فراہمی میں غیر ضروری تاخیر، بدانتظامی یا مشکلات قابلِ قبول نہیں ہوں گی اور شہریوں کو بلاوجہ انتظار نہ کرنا پڑے۔

انہوں نے کہا کہ ضلعی انتظامیہ حکومتی پروگراموں کے ثمرات حقیقی مستحقین تک پہنچانے کے لیے اقدامات کر رہی ہے، اور عوامی و فلاحی اداروں کی نگرانی کا سلسلہ جاری رہے گا تاکہ کسی بھی کوتاہی یا بے ضابطگی کی بروقت نشاندہی کر کے اس کا تدارک کیا جا سکے۔

تصویر: بشکریہ ڈی جی پی آر بلوچستان