ہرنائی میں ماہانہ ہیلتھ ریویو کانفرنس، ای پی آئی اور خسرہ و روبیلا مہم کا جائزہ، ڈی سی کی ہدایات

ہرنائی: ضلع ہرنائی میں عوامی صحت کی سہولیات بہتر بنانے اور متعدی بیماریوں کے خلاف جاری مہمات کی کارکردگی کا جائزہ لینے کے لیے ماہانہ ہیلتھ ریویو کانفرنس منعقد کی گئی۔ ڈپٹی کمشنر ہرنائی ارشد حسین جمالی کے زیرِ اہتمام اس کانفرنس میں محکمہ صحت کے تمام متعلقہ افسران، پروگرام مینیجرز اور ڈسٹرکٹ اسٹیک ہولڈرز نے شرکت کی۔

کانفرنس میں ضلع بھر میں صحت کی خدمات، جاری مہمات اور درپیش مسائل پر تفصیلی غور کیا گیا۔ بچوں کو موذی بیماریوں سے بچانے کے لیے حفاظتی ٹیکہ جات کی معمول کی مہم (EPI) کے اہداف کا جائزہ لیا گیا اور دور دراز علاقوں تک اس کی رسائی یقینی بنانے پر زور دیا گیا۔

خسرہ اور روبیلا کے خلاف جاری مہم کی پیش رفت پر اطمینان کا اظہار کرتے ہوئے باقی ماندہ بچوں کو کوریج میں لانے کے لیے حتمی حکمتِ عملی مرتب کی گئی۔ گھر گھر آگاہی اور ویکسینیشن مہمات میں لیڈی ہیلتھ ورکرز کی فعال شمولیت کو سراہا گیا اور ان کے فیلڈ کام کو مزید مضبوط بنانے پر اتفاق ہوا۔

بنیادی مراکزِ صحت کو درپیش انتظامی مسائل، ادویات کی فراہمی اور لاجسٹکس کے چیلنجز پر کھل کر بات کی گئی اور ان کے فوری تدارک کے احکامات جاری کیے گئے۔ اختتام پر ڈپٹی کمشنر ارشد حسین جمالی نے تمام اسٹیک ہولڈرز کو باہمی تعاون مزید بہتر بنانے کی ہدایت کی تاکہ ہرنائی کے ہر شہری تک معیاری اور بنیادی صحت کی سہولیات بلاتعطل پہنچ سکیں۔

تصویر: بشکریہ ڈی جی پی آر بلوچستان