گوادر میں معذوری سرٹیفکیٹس کے لیے میڈیکل بورڈ کا اجلاس، 37 کیسز منظور اور 5 مسترد

گوادر: محکمہ سوشل ویلفیئر گوادر کے زیرِ اہتمام افرادِ باہمی معذوری کی رجسٹریشن اور معذوری سرٹیفکیٹس کے اجراء کے لیے ماہانہ میڈیکل بورڈ کا اجلاس میر عبدالغفور کلمتی ٹیچنگ ہسپتال گوادر میں منعقد ہوا۔

اجلاس کی صدارت ہسپتال کے میڈیکل سپرنٹنڈنٹ ڈاکٹر حفیظ بلوچ نے کی، جبکہ ڈپٹی ڈائریکٹر سوشل ویلفیئر گوادر میر جان بلوچ نے خصوصی شرکت کی۔ محکمہ صحت، محکمہ سوشل ویلفیئر اور میڈیکل سوشل سروسز سنٹر گوادر کے افسران، طبی ماہرین اور دیگر عملہ بھی شریک ہوا۔

بورڈ نے موصولہ درخواستوں کا طبی اصولوں اور مقررہ معیار کے مطابق جائزہ لیا اور درخواست گزاروں کا طبی معائنہ کیا۔ بتایا گیا کہ مجموعی طور پر 47 درخواستیں موصول ہوئیں جن میں سے 41 درخواست گزار بورڈ کے سامنے پیش ہوئے۔ معائنے اور جانچ پڑتال کے بعد 37 کیسز سرٹیفکیٹس کے اجراء کے لیے منظور کیے گئے، 2 کیسز مزید طبی تحقیقات کے لیے ریفر کیے گئے اور 5 کیسز مقررہ طبی معیار پر پورا نہ اترنے کے باعث مسترد ہوئے، جبکہ 6 درخواست گزار پیش نہیں ہوئے۔

اجلاس میں زور دیا گیا کہ رجسٹریشن اور سرٹیفکیٹس کے اجراء کا عمل شفاف، میرٹ پر اور مقررہ طبی اصولوں کے مطابق جاری رکھا جائے تاکہ مستحق افراد کو بروقت سرٹیفکیٹس کے ساتھ حکومت کی سہولیات اور سماجی تحفظ تک رسائی حاصل ہو۔

ڈاکٹر حفیظ بلوچ نے کہا کہ مستحق افراد کو طبی معائنے اور معذوری کی تشخیص کی سہولیات فراہم کرنے کا سلسلہ جاری رہے گا، جبکہ محکمہ سوشل ویلفیئر اور محکمہ صحت باہمی رابطے سے رجسٹریشن کے عمل کو مزید مؤثر بنائیں گے۔ اجلاس میں ڈاکٹر فاروق، ڈاکٹر شئے سعید، سوشل ویلفیئر آفیسر میڈیکل سوشل سروسز سنٹر گوادر عبیداللہ اور متعلقہ اسٹاف بھی شریک تھے۔

تصویر: بشکریہ ڈی جی پی آر بلوچستان