گوادر میں عید میلاد النبی ﷺ کا جلوس، ملا فاضل چوک پر جلسے سے مولانا ہدایت الرحمن بلوچ کا خطاب

گوادر: جشنِ عید میلاد النبی ﷺ کے موقع پر گوادر میں پُرجوش اور روح پرور جلوس نکالا گیا، جس میں عاشقانِ رسول ﷺ کی بڑی تعداد نے شرکت کی۔ جلوس موسیٰ موڑ سے شروع ہو کر شہر کی مختلف شاہراہوں سے ہوتا ہوا ملا فاضل چوک پہنچا، جہاں جلسہ منعقد ہوا۔

شرکاء نے نعتیں اور درود و سلام پیش کرتے ہوئے حضور اکرم ﷺ سے اپنی والہانہ محبت و عقیدت کا اظہار کیا۔

جلسے سے رکن صوبائی اسمبلی مولانا ہدایت الرحمن بلوچ اور علمائے کرام نے خطاب کرتے ہوئے سیرتِ طیبہ ﷺ کے مختلف پہلوؤں پر روشنی ڈالی اور کہا کہ نبی کریم ﷺ کی حیاتِ مبارکہ پوری انسانیت کے لیے امن، محبت، رواداری، اخوت اور بھائی چارے کا بہترین عملی نمونہ ہے۔ انہوں نے زور دیا کہ کامیابی کے لیے سیرتِ رسول ﷺ اور سنتِ مبارکہ کو اپنی زندگی کا عملی حصہ بنانا ہوگا۔

جشنِ میلاد کے موقع پر ضلعی انتظامیہ اور پولیس کی جانب سے جلوس کے روٹ اور جلسہ گاہ کے اطراف سخت سیکیورٹی انتظامات کیے گئے۔

تصویر: بشکریہ ڈی جی پی آر بلوچستان