کوئٹہ ڈویلپمنٹ پیکج: زرغون روڈ ایک ماہ اور سریاب سروس روڈ دو ماہ میں مکمل کرنے کی ہدایت

کوئٹہ: کمشنر کوئٹہ ڈویژن ذیشان لاشاری کی زیر صدارت کوئٹہ ڈویلپمنٹ پیکج کے تحت جاری اور نئے ترقیاتی منصوبوں پر کام کی پیشرفت، فنڈز کی فراہمی اور دیگر امور کا جائزہ لینے کے لیے اجلاس منعقد ہوا۔

اجلاس میں ڈپٹی کمشنر کوئٹہ مہر اللہ بادینی، ڈپٹی کمشنر کوئٹہ ویسٹ منیر احمد درانی، ڈویژنل ڈائریکٹر ڈویلپمنٹ کوئٹہ ڈویژن ظہور احمد، ڈپٹی پروجیکٹ ڈائریکٹر کیو ڈی پی محمد عابد اور دیگر متعلقہ افسران شریک ہوئے۔ ڈپٹی پروجیکٹ ڈائریکٹر کیو ڈی پی نے جاری منصوبوں پر کام کی پیشرفت، فنڈز کی فراہمی اور درپیش رکاوٹوں سے متعلق تفصیلی بریفنگ دی۔

کمشنر ذیشان لاشاری نے کہا کہ کوئٹہ ڈویلپمنٹ پیکج ایک اہم ترقیاتی منصوبہ ہے جس کی تکمیل سے شہر میں ٹریفک کے مسائل پر قابو پانے کے ساتھ شہریوں کو بہتر سفری سہولیات میسر آئیں گی اور کوئٹہ کو جدید اور بہتر شہر بنانے میں مدد ملے گی۔ انہوں نے ہدایت کی کہ آئندہ اجلاس میں تمام جاری اور نئے منصوبوں کی گوگل میپ کے ذریعے واضح نشاندہی پیش کی جائے تاکہ ہر منصوبے کی صورتحال، محل وقوع اور پیشرفت کا مؤثر جائزہ لیا جا سکے۔

زرغون روڈ اور سریاب سروس روڈ کی ڈیڈ لائن

کمشنر نے خصوصی ہدایت کی کہ ہاکی چوک سے اکرم ہسپتال تک زرغون روڈ کی تعمیر ایک ماہ کے اندر مکمل کی جائے تاکہ منصوبے کا بروقت افتتاح ممکن ہو، جبکہ سریاب سروس روڈ کا کام دو ماہ میں مکمل کیا جائے۔ سریاب روڈ پر مساجد سے متعلق مسئلے پر انہوں نے ڈپٹی کمشنر کوئٹہ ویسٹ کو متعلقہ افراد سے رابطہ کرکے قابل عمل اور قابل قبول حل تلاش کرنے کی ہدایت کی تاکہ ترقیاتی کام میں مزید تاخیر نہ ہو۔

اجلاس میں اسپنی سبزل انڈر پاس کی تعمیر کا بھی جائزہ لیا گیا اور ڈپٹی کمشنر کوئٹہ ویسٹ کو اب تک کے اقدامات کا جائزہ لے کر پیش رفت رپورٹ پیش کرنے کی ہدایت کی گئی۔ کمشنر نے اسسٹنٹ کمشنرز کو بھی منصوبوں کے معیار، رفتار اور مقررہ مدت میں تکمیل کی نگرانی کے لیے ضروری ہدایات جاری کرنے کا کہا۔

اجلاس کو نئی اسکیموں کے بارے میں بھی بریفنگ دی گئی، جن میں ایئرپورٹ روڈ فلائی اوور، سریاب روڈ فلائی اوور، ایئرپورٹ روڈ پیڈسٹرین برج، ایئرپورٹ روڈ پر زیر زمین کیبلز کی تنصیب اور اے جی آفس کے لیے پارکنگ پلازہ کی تعمیر سمیت دیگر منصوبے شامل ہیں۔

کمشنر نے کہا کہ شہر میں بڑھتے ٹریفک مسائل کے پیش نظر ترقیاتی منصوبوں میں غیر ضروری تاخیر برداشت نہیں کی جائے گی، رکاوٹیں فوری دور کرکے کام کی رفتار تیز کی جائے اور مسلسل نگرانی و باہمی رابطے کے ذریعے پیکج کے ثمرات جلد از جلد شہریوں تک پہنچائے جائیں۔

تصویر: بشکریہ ڈی جی پی آر بلوچستان