کلانچ کے گورنمنٹ بوائز مڈل اسکول بل ہڈوکی میں پروجیکٹر اور ملٹی میڈیا کے ذریعے جدید تدریس کا آغاز

کلانچ: حکومتِ بلوچستان کی تعلیم دوست پالیسی اور طلبہ کو معیاری و جدید تعلیم کی فراہمی کے لیے جاری اقدامات کے تحت گورنمنٹ بوائز مڈل اسکول بل ہڈوکی، کلانچ میں جدید تدریسی نظام متعارف کرا دیا گیا، جہاں طلبہ کو پروجیکٹر اور بڑی اسکرین کے ذریعے تدریسی عمل سے روشناس کرایا جا رہا ہے۔

اس اقدام کے تحت اسکول میں ملٹی میڈیا بیسڈ تدریس کا آغاز کیا گیا ہے، جس سے طلبہ کو روایتی طریقۂ تدریس کے ساتھ جدید اور بصری انداز میں تعلیمی مواد تک رسائی حاصل ہوگی۔ اس حوالے سے اسکول کے ہیڈ ماسٹر قرار عمر کی کاوشیں قابلِ ذکر ہیں۔

اسکول انتظامیہ نے کہا کہ جدید ٹیکنالوجی کو تدریسی عمل کا حصہ بنانے کا مقصد طلبہ کی تعلیمی استعداد، تخلیقی صلاحیتوں اور سیکھنے کے عمل کو مزید مؤثر بنانا ہے۔

بغیر کسی سرکاری مالی معاونت کے مکمل ہونے والا یہ اقدام اس بات کی عکاسی کرتا ہے کہ تعلیمی ادارے، اساتذہ اور معاشرے کے باشعور افراد مشترکہ کاوشوں سے طلبہ کے لیے بہتر تعلیمی ماحول تشکیل دے سکتے ہیں۔ حکومتِ بلوچستان کی جانب سے معیاری تعلیم، جدید تدریسی سہولیات اور نوجوان نسل کو مستقبل کے تقاضوں سے ہم آہنگ کرنے پر خصوصی توجہ دی جا رہی ہے، اور اس اسکول میں جدید تدریسی نظام کا آغاز اسی تعلیمی وژن کی عملی مثال ہے۔

تصویر: بشکریہ ڈی جی پی آر بلوچستان