ڈیرہ مراد جمالی: ڈویژنل ہسپتال کی تین عمارتیں ایم ایس ایف اور سی ایل ایف کے حوالے، ڈپٹی کمشنر کا دورہ

نصیرآباد: ڈپٹی کمشنر نصیرآباد وریندر لعل نے ڈویژنل ہیڈکوارٹر ہسپتال ڈیرہ مراد جمالی کا تفصیلی دورہ کیا۔ اس موقع پر ایم ایس ایف (MSF) اور سی ایل ایف (CLF) سمیت مختلف غیر سرکاری تنظیموں کے نمائندوں نے بھی ان سے ملاقات کی اور جاری طبی منصوبوں کے بارے میں آگاہ کیا۔

تین عمارتیں غیر سرکاری اداروں کے سپرد

میڈیکل سپرنٹنڈنٹ ڈاکٹر حبیب اللہ پندرانی نے ڈپٹی کمشنر کو ہسپتال میں دستیاب طبی سہولیات اور جاری اقدامات پر بریفنگ دی۔ انہوں نے بتایا کہ عوام کو معیاری اور جدید طبی سہولیات کی فراہمی یقینی بنانے کے لیے ڈویژنل ہیڈکوارٹر سول ہسپتال کی تین عمارتیں غیر سرکاری تنظیموں کے حوالے کی جا رہی ہیں۔

ان کے مطابق نیو سی ایم ایچ ریڈیالوجی بلڈنگ ایم ایس ایف کے سپرد کی جا رہی ہے جہاں جدید تشخیصی سہولیات فراہم کی جائیں گی، جبکہ پہلے ریسکیو 1122 کے زیرِ استعمال ایک عمارت واپس لے کر سی ایل ایف کے حوالے کی جا رہی ہے تاکہ اس ادارے کے ذریعے ضلع بھر کے بچوں کو معیاری اور مؤثر علاج کی سہولت مل سکے۔

ڈاکٹر حبیب اللہ پندرانی نے بتایا کہ ان اداروں کے تعاون سے ہسپتال میں آغا خان ہسپتال کی طرز پر جدید طبی سہولیات متعارف کرانے کا منصوبہ ہے، جس سے علاقے کے عوام کو بہتر، بروقت اور معیاری علاج میسر آئے گا۔ انہوں نے کہا کہ ایم ایس ایف نے مقامی ضروریات اور موجودہ صورتحال کے پیشِ نظر طبی سہولیات میں مزید توسیع کا عندیہ بھی دیا ہے، جس سے صحت کے شعبے میں نمایاں بہتری متوقع ہے۔

ضلعی انتظامیہ کا مکمل تعاون

ڈپٹی کمشنر وریندر لعل نے کہا کہ ان کے دورے کا مقصد ہسپتال میں جاری ترقیاتی اور طبی اقدامات کا خود جائزہ لینا اور غیر سرکاری تنظیموں کے نمائندوں سے براہِ راست معلومات حاصل کرنا ہے۔ انہوں نے اطمینان ظاہر کیا کہ یہ ادارے عوامی ضروریات کو پیشِ نظر رکھتے ہوئے ہمدردانہ اور پیشہ ورانہ انداز میں صحت کی بنیادی سہولیات کی فراہمی میں مؤثر کردار ادا کر رہے ہیں۔

انہوں نے کہا کہ ضلعی انتظامیہ ان اداروں سے مکمل تعاون جاری رکھے گی تاکہ عوام کو زیادہ سے زیادہ ریلیف مل سکے، اور امید ظاہر کی کہ حکومت اور غیر سرکاری تنظیموں کی مشترکہ کاوشوں سے نہ صرف ہسپتال کی کارکردگی بہتر ہوگی بلکہ علاقے کے عوام کو جدید، معیاری اور قابلِ رسائی طبی سہولیات بھی میسر آئیں گی۔

تصویر: بشکریہ ڈی جی پی آر بلوچستان