ڈپٹی کمشنر نصیرآباد وریندر لعل کا ڈسٹرکٹ لائبریری کا دورہ، کھلی کچہری کے بعد بجلی اور پنکھے بحال

نصیرآباد: ڈپٹی کمشنر نصیرآباد وریندر لعل نے ڈسٹرکٹ لائبریری کا دورہ کیا اور مطالعے کے لیے آنے والے طلبہ سے ملاقات کر کے سہولیات اور درپیش مسائل کے بارے میں معلومات حاصل کیں۔

گزشتہ دنوں کھلی کچہری میں لائبریری سے مستفید ہونے والے طلبہ نے ڈپٹی کمشنر کو بجلی کی عدم دستیابی، پنکھوں کی کمی اور دیگر سہولیات نہ ہونے سے آگاہ کیا تھا۔ ڈپٹی کمشنر کے احکامات پر لائبریری میں بجلی بحال، پنکھے نصب اور دیگر ضروری سامان فراہم کیا گیا۔ طلبہ نے کھلی کچہری میں ڈپٹی کمشنر سے لائبریری کے دورے کی درخواست بھی کی تھی۔

طلبہ نے بنیادی سہولیات کی فوری بحالی پر ڈپٹی کمشنر کا شکریہ ادا کیا اور کہا کہ بروقت اقدامات سے انہیں مطالعے کا بہتر ماحول میسر آیا ہے۔ ڈپٹی کمشنر نے کہا کہ تعلیم کے بغیر معاشرے اور ملک کی ترقی ممکن نہیں، لائبریریاں علم کا خزانہ ہیں، طلبہ ان سے بھرپور استفادہ کریں اور مطالعے کو روزمرہ زندگی کا حصہ بنائیں۔ انہوں نے کہا کہ نوجوان نسل ملک و قوم کا مستقبل ہے اور طلبہ کے جائز مسائل کے حل اور تعلیمی اداروں و لائبریریوں میں سہولیات کی فراہمی کے لیے ضلعی انتظامیہ اپنی ذمہ داریاں پوری کرتی رہے گی۔

تصویر: بشکریہ ڈی جی پی آر بلوچستان