پسنی کے گرلز مڈل اسکول حیدر گوٹھ میں سائنس فیسٹیول 2026 اور شجرکاری مہم، طالبات کے تخلیقی ماڈلز

پسنی: گورنمنٹ گرلز مڈل اسکول حیدر گوٹھ پسنی میں طالبات کی تخلیقی صلاحیتوں کو اجاگر کرنے اور ماحولیاتی شعور کو فروغ دینے کے لیے سائنس فیسٹیول 2026 اور شجرکاری مہم کا انعقاد کیا گیا، جس میں طالبات اور اساتذہ نے بھرپور حصہ لیا۔

سائنس فیسٹیول میں جماعت پنجم تا ہشتم کی طالبات نے کباڑ اور ویسٹ میٹریل کو کارآمد بناتے ہوئے مختلف سائنسی تصورات پر مبنی تخلیقی ماڈلز پیش کیے۔ اس موقع پر "سوال پوچھنا ہی سائنس ہے" کا پیغام نمایاں کیا گیا، جس کا مقصد طالبات میں تجسس، تحقیق اور سائنسی سوچ کو فروغ دینا تھا۔ نمایاں کارکردگی دکھانے والی طالبات میں تعریفی اسناد بھی تقسیم کی گئیں۔

دریں اثنا اسکول ٹیچر سمیرہ کی زیرِ نگرانی اور چیمپئن کلب کے تعاون سے اسکول میں شجرکاری مہم کا آغاز کیا گیا، جس میں پھل دار، پھول دار اور سایہ دار پودے لگائے گئے اور طالبات کو اپنے لگائے گئے پودوں کی نگہداشت اور آبیاری کی ذمہ داری بھی سونپی گئی۔

اسکول انتظامیہ نے طالبات کی حوصلہ افزائی کرتے ہوئے کہا کہ حیدر گوٹھ کی طالبات کسی سے کم نہیں، اور سائنس، تخلیقی سرگرمیوں اور ماحول دوست اقدامات میں ان کی شرکت ان کی صلاحیتوں اور مثبت سوچ کی عکاسی کرتی ہے۔ انتظامیہ نے اساتذہ کی کاوشوں کو بھی سراہا جنہوں نے طالبات کو محنت، تحقیق اور آگے بڑھنے کی ترغیب دی۔

تصویر: بشکریہ ڈی جی پی آر بلوچستان