نصیر آباد: ڈی ایچ او کی ڈپٹی کمشنر وریندر لعل کو بریفنگ، بی ایچ یوز اور آر ایچ سیز میں حاضری کی نگرانی

نصیر آباد: ڈسٹرکٹ ہیلتھ آفیسر ڈاکٹر ایاز حسین جمالی نے ڈپٹی کمشنر نصیر آباد وریندر لعل کو ضلع بھر میں صحت عامہ کی صورتحال اور عوام کو دی جانے والی طبی سہولیات پر تفصیلی بریفنگ دی۔

ڈسٹرکٹ ہیلتھ آفیسر نے بتایا کہ دور دراز علاقوں میں قائم بنیادی مراکز صحت (BHU) اور دیہی مراکز صحت (RHC) عوام کو ان کے گھروں کے قریب معیاری طبی سہولیات فراہم کرنے میں فعال کردار ادا کر رہے ہیں۔ ان مراکز میں تعینات ڈاکٹرز اور پیرامیڈیکل اسٹاف کی باقاعدہ حاضری یقینی بنائی جا رہی ہے تاکہ دیہی علاقوں اور گوٹھوں کے مکین بلا تعطل طبی سہولیات سے مستفید ہو سکیں۔

انہوں نے بتایا کہ ڈاکٹرز اور عملے کی حاضری یقینی بنانے کے لیے باقاعدگی سے مانیٹرنگ اور اچانک دورے کیے جاتے ہیں، جبکہ مراکز صحت میں ادویات کی دستیابی اور ان کے ریکارڈ کی بھی مسلسل جانچ پڑتال کی جاتی ہے تاکہ عوام کو بروقت اور معیاری علاج مل سکے۔

ڈسٹرکٹ ہیلتھ آفیسر کے مطابق ڈویژنل ہیڈکوارٹر ہسپتال ڈیرہ مراد جمالی میں بھی طبی سہولیات کی بہتری کے لیے اقدامات جاری ہیں اور میڈیکل سپرنٹنڈنٹ (MS) کو سختی سے ہدایت کی گئی ہے کہ ہسپتال آنے والے مریضوں کو بہترین اور بروقت طبی سہولیات فراہم کی جائیں۔

ڈپٹی کمشنر وریندر لعل نے ہدایت کی کہ ضلع بھر میں صحت کی سہولیات کو مزید بہتر بنانے، ڈاکٹرز اور عملے کی حاضری یقینی بنانے اور ادویات کی بلا تعطل فراہمی کے لیے تمام دستیاب وسائل بروئے کار لائے جائیں تاکہ عوام کو ان کی دہلیز پر معیاری طبی سہولیات میسر آ سکیں۔

تصویر: بشکریہ ڈی جی پی آر بلوچستان