مچھ کول فیلڈ میں مائن سیفٹی ورکشاپ: کان مالکان اور منیجرز کو حفاظتی قوانین پر عملدرآمد کی تربیت

مچھ: انسپکٹوریٹ آف مائنز مچھ میں 25 اگست 2026 کو مچھ کول فیلڈ میں مائن سیفٹی قوانین کے مؤثر نفاذ، کان کنوں کے تحفظ اور حفاظتی معیار میں مزید بہتری کے حوالے سے مائن مالکان، مائن منیجرز، مائن سرداروں، ریزنگ کنٹریکٹرز اور دیگر اسٹیک ہولڈرز کے لیے اہم تربیتی ورکشاپ کا انعقاد کیا گیا۔

ورکشاپ میں انسپکٹر آف مائنز مچھ قربان علی عمرانی، الیکٹرک انسپکٹر آف مائنز مچھ عارف حسین عمرانی اور جونیئر انسپکٹر آف مائنز مچھ محمد اسامہ نے شرکاء کو مائن سیفٹی قوانین، حفاظتی انتظامات، برقی تحفظ اور کان کنوں کے تحفظ سے متعلق قانونی تقاضوں پر تفصیلی بریفنگ اور تربیت فراہم کی۔

اس موقع پر مچھ کول فیلڈ میں حفاظتی انتظامات، کان کنوں کی حاضری اور ریکارڈ، صحت و طبی سہولیات، مناسب وینٹیلیشن، برقی نظام کی حفاظت، ریسکیو سہولیات، فرسٹ ایڈ، حفاظتی آلات کی دستیابی، مائن انسپکشن اور تربیت یافتہ افرادی قوت سمیت دیگر قانونی تقاضوں کا تفصیلی جائزہ لیا گیا۔

ورکشاپ میں زور دیا گیا کہ مائن مالکان، منیجرز اور دیگر ذمہ داران حفاظتی قوانین اور محکمہ مائنز کے قواعد و ضوابط پر مکمل عملدرآمد یقینی بنائیں، جن میں کارکنوں کی باقاعدہ سیفٹی ٹریننگ، حاضری و ریکارڈ کی درستگی، صحت و صفائی کے انتظامات، مناسب حفاظتی آلات کی فراہمی اور ہنگامی صورتحال کے لیے ریسکیو سہولیات شامل ہیں۔

شرکاء کو بتایا گیا کہ مؤثر حفاظتی انتظامات اور قوانین پر عملدرآمد سے کان کنی کے دوران حادثات کی روک تھام، قیمتی انسانی جانوں کا تحفظ اور کان کنوں کے لیے محفوظ، صحت مند اور بہتر کام کا ماحول ممکن ہے۔ ورکشاپ کا مقصد مائنز میں حفاظتی کلچر کو فروغ دینا اور کان کنوں کے تحفظ کے معیار کو بہتر بنانا تھا۔

تصویر: بشکریہ ڈی جی پی آر بلوچستان