مولانا فضل الرحمن کو القابات سے پکارنے والوں کی وکالت زیب نہیں دیتی: دانیال چوہدری

اسلام آباد: وفاقی پارلیمانی سیکرٹری برائے اطلاعات و نشریات بیرسٹر دانیال چوہدری نے کہا ہے کہ مولانا فضل الرحمن ایک زیرک سیاستدان ہیں، تاہم جو لوگ ماضی میں انہیں چور، ڈاکو اور ڈیزل جیسے القابات سے پکارتے رہے، آج ان کی وکالت کرنا مولانا فضل الرحمن کو زیب نہیں دیتا۔

پیر کو پارلیمنٹ ہاؤس میں میڈیا سے گفتگو کرتے ہوئے انہوں نے کہا کہ سیاسی اختلافات اور ماضی کے بیانات کو نظرانداز کر کے سیاسی مؤقف اختیار کرنے سے قبل سابقہ رویوں کو بھی مدنظر رکھنا چاہیے۔

انہوں نے کہا کہ مولانا فضل الرحمن ایک تجربہ کار سیاستدان ہیں اور انہیں سیاسی معاملات میں اپنے مؤقف کا تعین کرتے ہوئے اس امر کو بھی دیکھنا چاہیے کہ ماضی میں ان کے بارے میں کیا زبان استعمال کی جاتی رہی ہے۔

بیرسٹر دانیال چوہدری نے کہا کہ جو سیاسی عناصر ماضی میں مولانا فضل الرحمن پر سخت تنقید کرتے رہے، ان کے حق میں آج مؤقف اختیار کرنے پر سیاسی تضاد کا سوال پیدا ہوتا ہے۔