محکمہ موسمیات: چترال، سوات، مری اور مظفرآباد سمیت بالائی علاقوں میں بارش اور لینڈ سلائیڈنگ کا امکان

اسلام آباد (اعتماد ڈیسک): محکمہ موسمیات نے کہا ہے کہ مغربی ہواؤں کا سلسلہ ملک کے بیشتر بالائی اور وسطی علاقوں پر اثر انداز ہو رہا ہے، جس کے باعث آج رات اور بدھ کو کئی علاقوں میں بارش متوقع ہے۔

پیشگوئی کے مطابق چترال، سوات، کوہستان، شانگلہ، بونیر، ایبٹ آباد، مری، گلیات، نیلم، مظفرآباد اور گردونواح میں بارش کے ساتھ لینڈ سلائیڈنگ بھی ہو سکتی ہے۔

اسلام آباد اور گردونواح میں مطلع ابر آلود رہے گا اور تیز ہواؤں اور گرج چمک کے ساتھ بارش کی توقع ہے، جبکہ چند مقامات پر ژالہ باری بھی ہو سکتی ہے۔

گزشتہ 24 گھنٹوں میں ملک کے بیشتر علاقوں میں موسم خشک رہا، تاہم بالائی خیبرپختونخوا، پوٹھوہار، بلوچستان، گلگت بلتستان اور کشمیر میں چند مقامات پر تیز ہواؤں اور گرج چمک کے ساتھ بارش ہوئی۔