شیعہ کانفرنس وفد کی کمشنر کوئٹہ سے ملاقات، ہزارہ ٹاؤن میں منشیات اور شیشہ پوائنٹس کے خلاف کارروائی کا حکم

کوئٹہ: کمشنر کوئٹہ ڈویژن ذیشان لاشاری سے بلوچستان شیعہ کانفرنس کے وفد نے ملاقات کی، جس میں زائرین کی نقل و حرکت اور تاجر برادری کو درپیش مسائل سمیت مختلف عوامی و انتظامی امور پر تبادلہ خیال کیا گیا۔ ملاقات میں ڈپٹی کمشنر کوئٹہ ویسٹ منیر احمد درانی سمیت دیگر افسران بھی موجود تھے۔

وفد نے بزنس ویزا پر سفر کرنے والے افراد کو پاکستان ہاؤس میں روکنے کے معاملے سے آگاہ کرتے ہوئے مشکلات کے فوری ازالے کی درخواست کی۔ وفد نے علمدار روڈ پر دو سے تین ماہ سے خراب ٹیوب ویل کی مرمت، تعلیمی اداروں میں بنیادی سہولیات اور تعلیمی ماحول کی بہتری، پولیو مہم میں متعلقہ علاقوں کے مقامی افراد کو ٹیموں میں شامل کرنے اور ہزارہ ٹاؤن میں منشیات، شیشہ پوائنٹس اور حقہ خانوں کے خلاف کارروائی کا مطالبہ بھی کیا۔

کمشنر ذیشان لاشاری نے یقین دہانی کرائی کہ بزنس ویزا پر سفر کرنے والوں کی مشکلات کے حل کے لیے متعلقہ حکام سے رابطہ کیا جائے گا، اور علمدار روڈ کے خراب ٹیوب ویل کی مرمت کے لیے واسا سے رابطے کی ہدایت کی۔ انہوں نے تعلیمی اداروں کی سہولیات کے لیے متعلقہ ڈائریکٹرز کو مراسلے بھیجنے کا فیصلہ کیا اور پولیو ٹیموں میں مقامی افراد کی تعیناتی یقینی بنانے کی ہدایت کی۔

کمشنر نے ڈپٹی کمشنر کوئٹہ ویسٹ منیر احمد درانی کو ہزارہ ٹاؤن میں منشیات کے خلاف سخت کارروائی اور شیشہ پوائنٹس و حقہ خانوں کے خلاف مؤثر اقدامات کی ہدایت بھی کی۔

تصویر: بشکریہ ڈی جی پی آر بلوچستان