سوراب: ڈپٹی کمشنر کی زیر صدارت نجی اسکولوں کے سربراہان کا اجلاس، سہولیات کی فراہمی کی ہدایت

سوراب: ڈپٹی کمشنر سوراب صاحبزادہ نجیب اللہ کی زیر صدارت نجی اسکولوں کے سربراہان کا ایک اہم اجلاس منعقد ہوا۔

اجلاس میں ایڈیشنل ڈپٹی کمشنر ریونیو سلمان علی بلیدی، اسسٹنٹ کمشنر گدر عبدالجبار بلوچ، ڈی او ای سوراب، مختلف میل و فیمیل ڈپٹی ڈسٹرکٹ ایجوکیشن آفیسرز سمیت وینس، جھالاوان، سن شائین، اسلامیہ، اینگلوفائل، اقراء اور دیگر نجی اسکولوں کے سربراہان نے شرکت کی۔

درپیش مسائل اور تجاویز

اسکول سربراہان نے اپنے اداروں کو درپیش مسائل اور تجاویز پیش کیں۔ اس موقع پر اینگلوفائل، اسلامیہ اور برائٹ بگننگز اسکولوں کے سربراہان نے موسم سرما کی تعطیلات کی فیس وصول نہ کرنے کا اعلان کیا۔

جبکہ دیگر اسکولوں کے سربراہان نے داخلہ فیس معاف کرنے اور موسم سرما کی تعطیلات کی فیس وصول کرنے سے متعلق اپنا مؤقف پیش کیا۔

اسکول سربراہان نے اداروں کے کرایوں، بجلی کے بلوں، رنگ و روغن، فرنیچر اور دیگر اخراجات سمیت تدریسی عملے کی تنخواہوں کے حوالے سے بھی اپنے مسائل سے آگاہ کیا۔

ڈپٹی کمشنر کی ہدایات

ڈپٹی کمشنر صاحبزادہ نجیب اللہ نے کہا کہ انہوں نے مختلف نجی اسکولوں کے دورے کیے ہیں، جہاں بعض اداروں میں بنیادی سہولیات کی کمی پائی گئی۔

انہوں نے اسکول سربراہان کو ہدایت کی کہ تعلیمی اداروں میں تمام ضروری سہولیات کی فراہمی یقینی بنائی جائے۔ بچوں کے لیے مناسب ڈیسک اور بیٹھنے کا انتظام کیا جائے۔

اسکولوں کی عمارتوں، فرنیچر، اسٹاف رومز، صفائی ستھرائی اور دیگر بنیادی سہولیات کو بہتر بنایا جائے، تاکہ طلبہ کو صاف ستھرا اور سازگار تعلیمی ماحول میسر آ سکے۔

ڈپٹی کمشنر نے مزید کہا کہ دیگر نجی اسکولوں کے دورے بھی کیے جائیں گے اور فیسوں سمیت دیگر متعلقہ امور پر مزید اجلاس منعقد کرکے معاملات کا جائزہ لیا جائے گا۔