دکی: ڈی ایچ کیو ہسپتال میں بی ایس ڈی آئی کے تحت آپریشن تھیٹر کی بحالی، ڈپٹی کمشنر کا کام جلد مکمل کرنے کا حکم

دکی: ڈپٹی کمشنر دکی فضل الرحمن کبدانی نے ڈسٹرکٹ ہیڈ کوارٹر ہسپتال دکی کا دورہ کیا، جہاں انہوں نے بلوچستان اسپیشل ڈویلپمنٹ انیشیٹو (BSDI) کے تحت آپریشن تھیٹر میں جاری تعمیراتی کام اور مشینری کی فراہمی و تنصیب کا تفصیلی معائنہ کیا۔

متعلقہ حکام نے آپریشن تھیٹر کی بحالی، تعمیراتی کام اور طبی مشینری کی تنصیب کی پیش رفت پر بریفنگ دی۔ ڈپٹی کمشنر نے ہدایت کی کہ باقی ماندہ کام اور مشینری کی تنصیب ہنگامی بنیادوں پر مکمل کی جائے تاکہ آپریشن تھیٹر جلد فعال ہو اور مریضوں کو ضروری طبی سہولیات میسر آئیں۔

انہوں نے واضح کیا کہ ہسپتال کے ترقیاتی کاموں میں معیار پر کوئی سمجھوتہ نہ کیا جائے، تمام منصوبے مقررہ مدت میں مکمل ہوں اور کام کی باقاعدہ نگرانی کی جائے۔ دورے کے دوران انہوں نے مریضوں کو دستیاب سہولیات اور ہسپتال کے انتظامی معاملات کا بھی جائزہ لیا۔

بعد ازاں ڈپٹی کمشنر نے BSDI فیز III کے تحت منظور شدہ پارکنگ شیڈ کے لیے مختلف مقامات کا معائنہ کیا اور موقع کی صورتحال کے مطابق مناسب جگہ کے انتخاب اور بروقت تکمیل کی ہدایت کی۔ انہوں نے کہا کہ BSDI منصوبوں کا مقصد عوام کو بنیادی سہولیات کی بہتر فراہمی اور سرکاری اداروں میں خدمات کا معیار بہتر بنانا ہے۔

تصویر: بشکریہ ڈی جی پی آر بلوچستان