دکی: ڈپٹی کمشنر فضل الرحمن کبدانی اور کمانڈر 87 ونگ کا بی ایس ڈی آئی فیز تھری کے منصوبوں کا معائنہ

دکی: ڈپٹی کمشنر دکی فضل الرحمن کبدانی نے کمانڈر 87 ونگ کرنل شاہد بلال کے ہمراہ بلوچستان اسپیشل ڈویلپمنٹ انیشیٹو (BSDI) فیز تھری کے تحت جاری ترقیاتی منصوبوں کا تفصیلی معائنہ کیا اور تعمیراتی کام، پیش رفت، معیار اور رفتار کا جائزہ لیا۔

انہوں نے ختمِ نبوت چوک، ڈسٹرکٹ ہیڈ کوارٹر ہسپتال اور قائداعظم مونومنٹ چوک پر جاری کاموں کا معائنہ کیا، جہاں متعلقہ حکام اور کنٹریکٹرز نے منصوبوں کی پیش رفت، تعمیراتی مراحل اور مقررہ مدت پر بریفنگ دی۔

ڈپٹی کمشنر نے ہدایت کی کہ تمام منصوبے منظور شدہ ڈیزائن، تکنیکی اسپیسیفیکیشن اور مقررہ معیار کے مطابق مکمل کیے جائیں۔ انہوں نے واضح کیا کہ ناقص یا غیر معیاری میٹریل کے استعمال کی اجازت نہیں دی جائے گی اور معیار پر کوئی سمجھوتہ برداشت نہیں ہوگا۔

انہوں نے کہا کہ ترقیاتی منصوبوں کی کامیابی صرف تعمیراتی کام مکمل کرنے میں نہیں بلکہ پائیدار اور معیاری سہولیات کی فراہمی میں ہے۔ تمام منصوبے مقررہ مدت میں مکمل کرنے کے لیے دستیاب وسائل بروئے کار لائے جائیں اور غیر ضروری تاخیر سے گریز کیا جائے، کیونکہ BSDI کے منصوبوں کی بروقت اور معیاری تکمیل ضلعی انتظامیہ کی ترجیحات میں شامل ہے۔

تصویر: بشکریہ ڈی جی پی آر بلوچستان