حب: ڈسٹرکٹ منیجر پی پی ایچ آئی ڈاکٹر مرشد دشتی کا بی ایچ یو حاجی مراد شیدی اور ڈام کا دورہ

حب: ڈسٹرکٹ منیجر پی پی ایچ آئی حب ڈاکٹر مرشد دشتی نے ضلع حب کے بنیادی مراکز صحت (BHU) حاجی مراد شیدی اور بی ایچ یو ڈام کا دورہ کیا۔

دورے کے دوران انہوں نے مراکز میں مختلف شعبوں کا تفصیلی معائنہ کرتے ہوئے عوام کو فراہم کی جانے والی طبی سہولیات کا جائزہ لیا۔

انہوں نے عملے کی حاضری، او پی ڈی سروسز، ادویات کی دستیابی، حفاظتی ٹیکہ جات کے پروگرام (EPI) کی فعالیت، ویکسینز اور اینٹی جنز کی دستیابی سمیت ماں اور بچے کی صحت (MNCH) سے متعلق سہولیات کا معائنہ کیا۔

انہوں نے مراکز میں تعینات طبی عملے سے ملاقات کی اور ہدایت کی کہ مریضوں کو بروقت اور بہتر طبی سہولیات کی فراہمی یقینی بنائی جائے اور تمام متعلقہ شعبوں کی کارکردگی مزید مؤثر بنائی جائے۔

صحت دہلیز ٹیلی ہیلتھ سسٹم

ڈسٹرکٹ منیجر نے عملے کو صحت دہلیز (Sehat Dehleez) ٹیلی ہیلتھ سسٹم کے حوالے سے تفصیلی بریفنگ دی۔ انہوں نے اس نظام کے طریقہ کار اور افادیت سے آگاہ کیا اور بتایا کہ اس کے ذریعے عوام گھر بیٹھے ماہر ڈاکٹروں سے طبی مشاورت حاصل کر سکیں گے، تاکہ دور دراز علاقوں کے عوام بھی معیاری طبی رہنمائی سے مستفید ہو سکیں۔

انہوں نے دونوں بنیادی مراکز صحت کا متعلقہ ریکارڈ بھی چیک کیا اور صحت کی سہولیات کی فراہمی، انتظامی امور اور طبی خدمات کی بہتری سے متعلق مختلف پہلوؤں کا جائزہ لیا۔

پی پی ایچ آئی حب کی جانب سے بنیادی مراکز صحت کے تسلسل کے ساتھ دوروں اور مانیٹرنگ کا مقصد طبی سہولیات کا معیار بہتر بنانا، عملے کی کارکردگی یقینی بنانا اور عوام کو ان کی دہلیز پر بہتر صحت کی خدمات فراہم کرنا ہے۔