بارکھان: ڈپٹی کمشنر سعید الرحمٰن کاکڑ کی زیر صدارت ڈی سی سی و ڈی آئی سی سی اجلاس، این-70 پر سیکیورٹی سخت

بارکھان: وزیر اعلیٰ بلوچستان میر سرفراز بگٹی کے امن، عوامی تحفظ اور مؤثر طرزِ حکمرانی کے وژن کے تحت ڈپٹی کمشنر بارکھان سعید الرحمٰن کاکڑ کی زیرِ صدارت ڈسٹرکٹ کوآرڈینیشن کمیٹی (DCC) اور ڈسٹرکٹ انٹیلی جنس کوآرڈینیشن کمیٹی (DICC) کے ماہانہ اجلاس منعقد ہوئے۔

اجلاس میں سپرنٹنڈنٹ آف پولیس، حساس اداروں کے نمائندوں، قانون نافذ کرنے والے اداروں کے افسران اور مختلف محکموں کے ضلعی سربراہان نے شرکت کی۔ ضلع کی مجموعی امن و امان کی صورتحال، سیکیورٹی انتظامات، بین الادارہ تعاون، انٹیلی جنس معلومات کے تبادلے اور عوامی مفاد کے مختلف امور کا تفصیلی جائزہ لیا گیا۔

ڈپٹی کمشنر نے متعلقہ اداروں کو ہدایت کی کہ ضلع بھر میں امن و امان کے قیام کے لیے باہمی رابطے اور ادارہ جاتی ہم آہنگی کو مزید مؤثر بنایا جائے۔ انہوں نے قومی شاہراہ این-70 پر سیکیورٹی انتظامات مزید سخت کرنے، مشترکہ گشت بڑھانے، چیکنگ کا نظام مؤثر بنانے اور مشکوک افراد و سرگرمیوں پر کڑی نظر رکھنے کی ہدایت کی تاکہ شاہراہ استعمال کرنے والے شہریوں کو محفوظ اور پرامن ماحول ملے۔

سعید الرحمٰن کاکڑ نے کہا کہ عوام کے جان و مال کا تحفظ اور ضلع میں پائیدار امن و استحکام تمام متعلقہ اداروں کی مشترکہ ذمہ داری ہے۔ انہوں نے عزم ظاہر کیا کہ ضلعی انتظامیہ، پولیس، قانون نافذ کرنے والے اور حساس ادارے باہمی تعاون، پیشہ ورانہ انداز اور بروقت اقدامات کے ذریعے امن و امان ہر صورت برقرار رکھنے کے لیے اپنی ذمہ داریاں نبھاتے رہیں گے اور کسی بھی ہنگامی صورتحال سے نمٹنے کے لیے ہمہ وقت تیار رہیں گے۔

تصویر: بشکریہ ڈی جی پی آر بلوچستان