استا محمد: ڈی سی محمد رمضان پلال کی پولیو ٹیموں کی سیکیورٹی اور مائیکرو پلانز کی فیلڈ ویلیڈیشن کی ہدایت

استا محمد: ڈپٹی کمشنر محمد رمضان پلال کی زیر صدارت ڈسٹرکٹ پولیو ایریڈیکیشن کمیٹی کا اجلاس ہوا، جس میں آئندہ قومی انسدادِ پولیو مہم کی تیاریوں، انتظامات اور محکموں کی ذمہ داریوں کا جائزہ لیا گیا۔

اجلاس میں ڈسٹرکٹ ہیلتھ آفیسر ڈاکٹر امیر علی جمالی، ڈاکٹر خلیل مستوئی، عالمی ادارہ صحت کے ڈی پی او این اسٹاپ آفیسر ڈاکٹر ناصر کاکڑ سمیت محکمہ صحت، ضلعی انتظامیہ، پولیس اور دیگر محکموں کے افسران نے شرکت کی۔ گزشتہ مہم کے نتائج، ٹیموں کی کارکردگی، کوریج اور فیلڈ مشکلات کا جائزہ لیا گیا اور مائیکرو پلانز، ٹیموں کی تشکیل، تربیت، سیکیورٹی، ٹرانسپورٹ اور حساس علاقوں پر بریفنگ دی گئی۔

ڈپٹی کمشنر نے پولیو ٹیموں اور فیلڈ ورکرز کے لیے جامع سیکیورٹی انتظامات یقینی بنانے اور انتظامیہ، پولیس، محکمہ صحت اور عالمی ادارہ صحت کے درمیان رابطہ کاری مضبوط کرنے کی ہدایت کی۔ انہوں نے کہا کہ مائیکرو پلانز زمینی حقائق کے مطابق ہوں اور ان کی فیلڈ ویلیڈیشن لازمی کرائی جائے تاکہ کوئی علاقہ یا بچہ رہ نہ جائے۔

محمد رمضان پلال نے مسڈ چلڈرن تک دوبارہ رسائی کے لیے خصوصی حکمت عملی، دور دراز علاقوں پر خصوصی توجہ اور ٹیموں کی حاضری و کارکردگی کی مسلسل نگرانی کی ہدایت کی۔ انہوں نے کہا کہ بچوں کو پولیو سے محفوظ بنانا مشترکہ ذمہ داری ہے اور اس میں کسی غفلت یا کوتاہی کو برداشت نہیں کیا جائے گا۔

تصویر: بشکریہ ڈی جی پی آر بلوچستان