استامحمد ڈی سی سی اجلاس: 30 جولائی تک زیر تعمیر منصوبے مکمل کرنے کا حکم، پولیس و کسٹمز کی غیر حاضری پر برہمی

استامحمد: ڈپٹی کمشنر استامحمد محمد رمضان پلال کی زیر صدارت ڈسٹرکٹ کوآرڈینیشن کمیٹی (DCC) کا اہم اجلاس منعقد ہوا، جس میں اسسٹنٹ کمشنر استامحمد محمد رمضان اشتیاق، پرنسپل گرلز کالج استامحمد، پرنسپل بوائز ڈگری کالج استامحمد پروفیسر عبیداللہ خان زہری، ایکسین بلڈنگز، ایکسین پبلک ہیلتھ انجینئرنگ (PHE)، ایکسین اریگیشن، اسسٹنٹ ڈائریکٹر لوکل گورنمنٹ محمد یاسین جمالی، سی ٹی ڈی، اسسٹنٹ ڈسٹرکٹ ایجوکیشن آفیسر اور ایجوکیشن آفیسر عبدالکریم مستوئی سمیت دیگر محکموں کے افسران نے شرکت کی۔

اجلاس میں پولیس اور کسٹمز حکام کی عدم شرکت پر ڈپٹی کمشنر نے سخت برہمی کا اظہار کیا اور ہدایت کی کہ آئندہ ایسے اہم اجلاسوں میں متعلقہ اداروں کی حاضری یقینی بنائی جائے۔

اجلاس میں بی ایس ڈی آئی کے تحت جاری ترقیاتی منصوبوں کا تفصیلی جائزہ لیا گیا، جبکہ مدارس کی رجسٹریشن، ٹریفک نظام کی بہتری، غیر قانونی پیٹرول پمپس کے خلاف کارروائی اور ایرانی پیٹرول کی فروخت و قیمتوں کے تعین سے متعلق اہم فیصلے کیے گئے۔

محمد رمضان پلال نے کہا کہ ڈسٹرکٹ کوآرڈینیشن کمیٹی ایک اہم فورم ہے جہاں ضلع بھر کے جاری اور مجوزہ ترقیاتی و فلاحی منصوبوں کی منظوری اور نگرانی کی جاتی ہے۔ انہوں نے تمام محکموں، خصوصاً پبلک ہیلتھ انجینئرنگ کو ہدایت کی کہ 30 جولائی 2026ء تک تمام زیر تعمیر منصوبے ہر صورت مکمل کیے جائیں۔

اجلاس میں سیف سٹی پراجیکٹ پر خصوصی غور کیا گیا اور زور دیا گیا کہ منصوبہ اعلیٰ معیار اور منظور شدہ پی سی ون کے مطابق مکمل کیا جائے تاکہ شہریوں کو جدید سکیورٹی سہولیات میسر آئیں۔ آخر میں ڈپٹی کمشنر نے افسران کو اپنے شعبوں میں کارکردگی بہتر بنانے اور عوامی مسائل کے حل کے لیے مؤثر اقدامات کی ہدایت کی۔

تصویر: بشکریہ ڈی جی پی آر بلوچستان