یومِ آزادی تقریری مقابلے: مشیر کھیل مینا مجید بلوچ نے کہا نوجوان قوم کا قیمتی سرمایہ ہیں، فاتحین میں انعامات تقسیم

کوئٹہ: صوبائی مشیر برائے کھیل و امورِ نوجوانان محترمہ مینا مجید بلوچ نے کہا ہے کہ نوجوان کسی بھی ملک و قوم کا قیمتی سرمایہ اور روشن مستقبل کی ضمانت ہوتے ہیں، اور حکومت بلوچستان وزیر اعلیٰ میر سرفراز بگٹی کی قیادت میں نوجوانوں کی ذہنی، فکری، علمی، تخلیقی اور عملی صلاحیتیں نکھارنے کے لیے ہر سطح پر بھرپور اقدامات کر رہی ہے۔

وہ ڈائریکٹوریٹ آف یوتھ افیئرز حکومت بلوچستان کے زیرِ اہتمام 79ویں یومِ آزادی کے سلسلے میں منعقدہ تقریری مقابلوں کی تقریب سے خطاب کر رہی تھیں۔ تقریب میں سیکرٹری محکمہ کھیل درا بلوچ، محکمہ کھیل و امورِ نوجوانان کے اعلیٰ حکام، مختلف تعلیمی اداروں کے طلباء و طالبات اور دیگر شرکاء نے شرکت کی۔

مینا مجید بلوچ نے کہا کہ یومِ آزادی ہمیں تحریکِ پاکستان میں بزرگوں کی جدوجہد اور لازوال قربانیوں کی یاد دلاتا ہے، نوجوان نسل ملک کی ترقی، خوشحالی، امن اور استحکام کے لیے علم، تحقیق، مثبت سوچ اور تعمیری سرگرمیوں کو اپنی زندگی کا حصہ بنائے۔

انہوں نے کہا کہ کھیلوں، تقریری و ادبی سرگرمیوں، تربیتی پروگراموں اور تعلیمی و فنی مہارتوں کے ذریعے نوجوانوں کی شخصیت سازی، خود اعتمادی اور قائدانہ صلاحیتوں کو فروغ دیا جا رہا ہے۔ تقریری مقابلے جیسے پروگرام نوجوانوں میں اظہارِ خیال، تحقیق اور مطالعے کو اجاگر کرنے کے ساتھ قومی یکجہتی، حب الوطنی اور مثبت سوچ کو بھی فروغ دیتے ہیں۔

صوبائی مشیر نے کہا کہ بلوچستان کے نوجوان باصلاحیت اور باہمت ہیں، انہیں صرف مناسب مواقع، رہنمائی اور سرپرستی کی ضرورت ہے۔ انہوں نے مقابلوں میں حصہ لینے والے طلبہ کی حوصلہ افزائی کرتے ہوئے کہا کہ کامیابی صرف مقابلہ جیتنے کا نام نہیں بلکہ سیکھنے، صلاحیتیں بہتر بنانے اور مسلسل آگے بڑھنے کا عمل ہے۔

تقریب میں مختلف سکولوں کے طلباء و طالبات نے یومِ آزادی کے حوالے سے تقاریر اور ٹیبلوز پیش کیے۔ اختتام پر نمایاں کارکردگی دکھانے والے طلباء و طالبات اور دیگر شرکاء میں انعامات اور اسناد تقسیم کی گئیں۔

تصویر: بشکریہ ڈی جی پی آر بلوچستان